ПРИЧИНА
Дали ќе се појават или не флеки на вашата кожа, е запишано во гените, но тоа зависи и од типот на кожата. Хиперпигментацијата е најчеста кај лица со посветол тен откако ќе изгорат на сонце. Непријатните промени на бојата на кожата може да станат забележливи дури по неколку месеци или една година и тоа најчесто на лицето, рамениците, односно оние делови кои се најмногу изложени на сонце. Проблемот е што тие промени се зголемуваат со текот на годините, бидејќи кожата ги памети траумите што ги преживеала, па по секое повторно изложување на сонце бројот на флеки се зголемува. Важно е да се нагласи дека солариумот, исто така, влијае на овие промени.
ПРЕВЕНЦИЈА
Најдобрата превенција почнува во детството. Затоа мора децата да ги заштитувате од сонцето и никако не смеат да изгорат. Точно е дека витаминот Д од сончевата светлина е многу потребен, но гледајте изложувањето на сонце да биде во претпладневните или попладневните часови. И никогаш не идете никаде без висок фактор на заштита. Покрај флеките, младежите што се појавуваат пред пубертетот бројно ќе се зголемат при изложување на сонце. Жените посебно треба да се чуваат, особено лицето, бидејќи кожата старее од сонцето и се појавуваат брчки. Затоа, најдобра заштита од појава на флеки е шешир со широк обод и крема со заштитен фактор.
РЕШЕНИЕ
Единствено лекар може да ви каже дали можете целосно да ги отстраните дамките или не можете. Некои флеки може само да се ублажат и тоа се таканаречени длабоки дамки кои се појавуваат во раниот период од животот. Останатите може да се отстранат и тоа со хемиски пилинг и креми препорачани од дерматолог.
Важно е да се знае дека терапијата секогаш е во рацете на дерматологот, дека лек има, но дека е потребна посветеност. Хиперпигменатцијата може да се реши и по ласерски пат, но најважно е да се одреди за каков тип флека станува збор и, пред се, да се постави дијагноза.
