Остеоартритисот е најчест облик на артритис кој погодува многу луѓе во светот. До него доаѓа кога заштитната ‘рскавица на краевите на коските ќе се истроши со тек на времето. Иако кај остеоартритот може да биде оштетен кој било зглоб во телото, тој најчесто ги погодува зглобовите на колената, колковите и на рацете, односно зглобовите кои носат поголема тежина.
При ова заболување, кога е коленото во прашање, доаѓа до оштетување и трошење на ’рскавицата на овој дел од телото.
Како резултат на ова доаѓа до контакт на коските на зглобот. Преголемото триење може да предизвика и болка, оток, вкочанетост, ограниченост при движењето кај народот познато како формирање шилци.
Остеоартритисот на колено е најчест тип на артритис. Покрај фактот што се јавува и кај помладата популација, шансата истиот да се развие по 45 година е голема. Жените се поподложни на остеоартритис од мажите.
Се манифестира со болка во коленото при физичка активност, оток, чувство на топлина во зглобовите, вкочанетост во коленото, особено наутро или по подолго седење, гласно крцкање на коленото (грепитации) при движење. Со намалување на подвижноста на коленото пациентите имаат потешкотии при секоја физичка активност.
Најчеста причина за остеоартритис на колено е староста. Речиси секој повозрасен човек има одреден степен на остеоартритис. Но, постојат неколку фактори кои го зголемуваат ризикот од појава на остеоартритис:
• Тежина: Прекумерната тежина го зголемува притисокот на зглобовите, особено на колената. Секое покачено кило се одразува 3-4 пати повеќе на вашите колена.
• Пол: Жените постари од 55 години се поподложни на остеоартритис на колено од мажите, поради хормоналниот дисбаланс.
• Наследно: Може да се појави и поради одредени наследни абнормалности во формата на коските околу зглобот на коленото.
• Повреди: Оние кои постојано се во некаква активност на работното место од типот на постојано клекнување, неприродна позиција на телото или креваат голем товар му прават голем притисок на зглобот на коленото, а со тоа ги зголемуваат шансите за остеоартритис на колената.
• Спорт: Рекреативните и професионалните спортисти често подлежат на повреди, а со тоа се изложени на поголем ризик од остеоартритис на колено. Важно е да се потенцира дека постојаното умерено спортување ги зајакнува зглобовите и мускулите околу коленото, а со тоа го намалува ризикот од остеоартритис.
• Поврзани заболувања: Оние кои имаат ревматоиден артритис, вториот најчест тип на артритис, исто така, имаат ризик да заболат од остеоартритис. Во ризичната група се и оние кои имаат метаболички нарушувања, како на пример, вишок на железо или покачен хормон за раст.
