Долго немало нови лекови против тубрекулозата, а сега еден доби одобрение – трет во период од шест години, пишува Дојче веле. Девет милиони луѓе ширум светот секоја година заболуваат од туберкулоза, особено во сиромашните земји.
– Туберколузата не може да се лекува само со еден лек. Бактериите брзо стануваат отпорни на тој лек, објаснува Себастијан Дитрих од организацијата Лекари без граници, а пренесува Дојче веле.
Целта на Светската здравствена организација е секоја година да бидат регистрирани десет проценти помалку заболени од претходната. Затоа, вели тој, за успешно лекување е потребна комбинација од лекови, обично три до пет.
– Ако пациентот земе само еден лек и тој ќе делува. На пациентот во почетокот му е подобро, но некои бактерии стануваат резистентни, се размножуваат и болеста се враќа, вели Дитрих.
Туберкулозата е заразна болест. Се пренесува со бактеријата mycobacterium tuberculosis. И понатаму се смета дека тоа е „болест на сиромаштијата“. Бројни пациенти живеат во сиромашни земји, како африканските. Тоа е особено проблем затоа што во многу тамошни региони постои голем проблем со ХИВ-инфекцијата.
– Кај ХИВ имунитетот слабее. Тоа значи дека има и повеќе случаи на активна туберкулоза, вели Дитрих.
Препознавањето и поставувањето на дијагнозата на туберкулозата не е тешко.
– Се што е потребно е микроскоп, објаснува Дитрих.
Но тука постои уште еден проблем: бактериите се гледаат под микроскоп, но не може да се каже дали тие се резистентни на лекови или не. Лекарите засега мораат да развијат сложена бактериска култура, после тоа потребно е таа да се тестира на секој лек за да се открие на кој лек реагираат бактериите, а на кој не. „Сето ова трае околу три месеци“, истакнува Дитрих.
Новиот лек веќе е одобрен, но се уште не е достапен на пазарот, а Дитрих проценува дека тоа ќе се случи наскоро. Околу 85 отсто од новите инфекции се регистрирани во Африка, југоисточна Азија и земјите во западниот Тихи Океан. Исто така, голем број заразени има и во Источна Европа. Погодени се земји како Грузија, Казахстан и Белорусија.
