Истражувачите од Универзитетскиот медицински центар во Амстердам откриле ретка генетска варијација која во голема мера ја намалува можноста за Алцхајмерова болест и уште два облика на деменција. Освен тоа можно е овој ген да ја зголемува шансата за подолг живот, објавено е во научниот магазин Acta Neuropahologica.
Според информациите објавени во текстот, ова исклучително важно откритие донесува нови можности во развојот на лекот за Алцхајмерова болест, но и други облици на деменција која засега не може да се излекува. Научниците очекуваат дека откритието на овој ген задолжен за регулирање на системот за чистење на мозокот од отпад ќе доведе чекор поблизу до лекот за Алцхајмерова болест.
Истражувањето кое го води клиничкиот генетичар Хене Холстехе во УМЦ во Амстердам се обавува над шеснаесет различни групи популации во 60 истражувачки институти во Европа и Северна и Јужна Америка. Хене Холстехе е позната по своето генетско истражување кај личностите постари од 100 години, кои всушност и имале важна улога во ова откритие.
Во едно од претходните истражувања генетската варијанта Rs 72824905 е доведена во врска со заштитата од Алцхајмеровата болест, но овој ген е исклучително редок – само една од сто личности со европски предци го има овој ген – сега анализирале податоци од 53 000 лица од Европа и Северна Америка, со што е зголемен бројот на личности со овој ген кои учествувале во истражувањето.
Резултатите од истражувањето се спектакуларни: личностите со ген Rs 72824905 имаат на половина помала шанса да заболат од Алцхајмерова болест, фронтотемпорална деменција и деменција со Левиеви тела (ДЛТ). Влијанието на овој ген врз развојот на васкуларна деменција не е опфатено со ова истражување. Научниците се надевале дека новооткриениот ген има заштитна улога и во развивањето на Паркинсоновата болест, мултипла склерозата и амиотрофичната латерална склероза (АЛС), но тоа не е случај.
Улогата на генот Rs 72824905 се доведува и во врска со подолг живот.
Личностите со овој ген постари од 90 години, чии податоци се анализирани, живеат во просек една година подолго, но со оглед на тоа дека анализираната група е релативно мала не е можно да исклучи случајноста. Сепак, единствената група личности постари од 100 години, од истото истражување, два пати почесто го има овој ген. Еден од носителите на генот, здрава жена од 104 години, покрај новооткриениот ген, дури носи и два гена кои кај другите пациенти предизвикуваат исклучително брзо производство на штетни протеини во мозочните клетки. Носителите на тие два гена често во младоста заболуваат од деменција, додека стогодишниците носители на овој ген се исклучително ретки.
Меѓутоа, генот Rs 72824905 изгледа дека има заштитна улога во производството на овој протеин: кај пациентите кои имаат проблем со памтењето, но се и носители на овој ген, процесот на производство на штетните протеини во мозочните клетки е значително побавен. Токму заради тоа научниците веруваат дека со откривањето на начинот на кој овој ген функционира ќе бидат значително поблиску до лекот за Алцхајмерова болест.
При облиците на деменција кои ги опфатило истражувањето мозочните клетки изумираат како резултат на производство на штетните протеини во нив. Иако се уште не е познато на кој точно начин доаѓа до тоа, научниците веруваат дека во голем дел е предизвикано од фактот дека системот за чистење на мозокот од отпад со годините се послабо функционира.
