Резултатите од неодамнешната новозеландска студија ги предупредуваат идните мајки за време на последните месеци од бременоста да не спијат на грб зашто таа навика би можела да му наштети на нормалниот развој на фетусот.
Научниците до овој заклучок дошле врз основа на истражувањето во кое учествувале 30 жени во деветтиот месец од бременоста. Тие со помош на инфрацрвена камера ги набљудувале учесничките во истражувањето додека спијат, а со помош на електрокардиограм го следеле срцевиот ритам на фетусот и идните мајки.
Било забележано дека фетусот е забележително помалку активен кога трудницата спие на грб, што може да доведе до пореметување на развојот, па дури и до спонтан абортус. Од друга страна, кога идната мајка спие на левиот или десниот колк, активноста на фетусот е нормална.
Една минатогодишна студија веќе укажала на тоа дека ако мајката спие на грб се намалува потрошувачката на кислород кај плодот и се зголемува ризикот од фетална смрт.
