Ако отсекогаш сте се прашувале кога може да ви дојде „судниот ден“ научниците откриле тест кој со повеќе од 80% сигурност предвидува дали и од што ќе умрете во следните 10 до 16 години.
Во истражувањето спроведено во Германија учествувале повеќе од 44 000 луѓе на возраст од 18 до 109 години. Со анализа на примерок од крв издвоени се биомаркери поврзани со имунитетот, контролата на глукоза, крвниот притисок, циркулацијата и генерално со воспалителните процеси во телото. Врз основа на овие биомаркери стручњаците добиваат мошне прецизна слика за здравствената состојба на пациентот, а резултатите со кои располагаат им овозможуваат да го проценат нивниот животен век, односно колкави се шансите во следните 2 до 16 години пациентот да умре.
Заради прецизните податоци за времето и причината за смрт, првата реакција на јавноста за ова револуционерно откритие (кое се уште е во фаза на испитување) била ужасен страв и паника, меѓутоа, неговата цел е всушност спротивна. Поентата на овие анализи не е проценка на ризикот од смрт, туку превенција. Научниците веруваат дека со помош на овие новооткриени биомаркери ќе успеат на време да ги детектираат потенцијалните заболувања и да спречат развивање на болести, а со самото тоа и смртен исход. За сега тестот се покажал најкорисен кај оние кои боледуваат од зголемен крвен притисок, холестерол и триглицериди, личности со болести на срцето, како и болни од различни видови рак.
