Европските и канадските научници можеби го пронајдоа објаснувањето за ретките, но сериозни појави на крвни згрутчувања кај некои лица вакцинирани со вакцината на АстраЗенека против коронавирус, пренесува британската агенција Ројтерс.
Тие веруваат дека феноменот е сличен на оној кој ретко се случува со лекот хепарин за “разредување“ на крвта, познат како тромбоцитопенија предизвикана од хепарин (HIT).
Во таа форма на тромбоцитопенија, лекот го поттикнува имуниот систем на производство на антитела кои ги активираат тромбоцитите кои инаку предизвикуваат згрутчување на крвта.
И други лекови освен хепаринот, исто така може да предизвикаат нарушувања на згрутчувања на крвта кои многу наликуваат на HIT и научниците сметаат дека во ретки случаеви и вакцината на АстраЗенека може да биде таков “тригер“.
Кај четири претходно здрави лица кои примиле вакцина на АстраЗенека, се развиле потенцијално смртоносни згрутчувања, а имале ист вид на антитела кои ги активираат тромбоцитите и поттикнуваат создавање на згрутчувања во тромбоцитопенијата предизвикана од хепаринот, напишале германските, австриските и канадските научници во трудот објавен завчера на Research Square.
Дваесет вакцинирани лица кои не развиле згрутчувања немале такви антитела.
Во коментар објавен со ова истражување, се напоменува дека тромбоцитопенијата предизвикана од лекови може да се лекува, ако точно се дијагностицира.
Милиони лица, без никакви проблеми ја примија вакцината и европските регулатори и Светската здравствена организација објавија дека придобивките од вакцината на АстраЗенека ги надминуваат ризиците.
