![pusenje](https://panacea.mk/wp-content/uploads/2018/06/pusenje-1-696x441.jpg)
Дека пасивното пушење може да има сериозни последици врз здравјето на непушачите, е одамна познато, но најновото австралиско истражување покажало дека на ризик од болести се значително поизложени жените.
Како што е објавено во магазинот „Journal of Clinical Endocrinology & Metabolism“, тинејџерките се многу повеќе изложени на ризикот од болести предизвикани од пасивното пушење отколку нивните врсници од спротивниот пол.
-
Следниот чекор на научниците ќе биде насочен кон објаснување зошто жените изложени на чадот од тутунот се поподложни на ризици од мажите
Научниот тим на Универзитетот Западна Австралија спроведе истражување во кое биле опфатени повеќе од илјада тинејџери непушачи, со фокус на навиките за пушење во нивниот дом. Испитаниците биле родени помеѓу 1989 и 1992 година, а биле следени активности поврзани со чадот од цигари, пред се, кај нивните родители, а потоа и кај другите членови на семејството.
Истражувањето покажало дека речиси секое второ дете во својот дом е изложено на пасивно пушење, а врз основа на примероците на крв, се покажало дека тинејџерките се многу поизложени на ризик од повисок холестерол и срцеви заболувања.
Австралиските научници тврдат дека истражувањето е од големо значење во разбирањето на ефектите од пасивното пушење и најавуваат дека следниот чекор ќе биде насочен кон објаснување зошто жените изложени на чадот од тутунот се поподложни на ризици од мажите.