За прегледот кај гинекологот да биде што поефикасен и подетален, потребно е лекарот темелно да го информирате за сопственото тело и животните навики. Ова се пет важни работи кои, секако, треба да му ги кажете на матичниот гинеколог.
Ако се впуштите во сексуален однос без заштита
Овој податок може да биде многу важен особено ако сте се впуштиле во љубовна авантура со нов партнер . Вирусните и бактериските заболувања не се реткост и не се случуваат само на другите. На тој начин вашиот гинеколог ќе направи многу поширок и подетален преглед.
Ако сте доживеале крварење по сексуалниот однос
Ако станува збор само за една ситуација во која сте воделе љубов, страствено и поенергично од вообичаеното, нема место за грижа. Но, ако вашиот проблем се повторува, оваа информација ќе му биде од корист на геникологот. Крварењето по водењето љубов може да биде предизвикано од различни проблеми – од сувост на слузницата, па се до инфекции.
Ако сте забележале промени при менструалниот циклус
Промените кај месечното крварење може да бидат показател на одредени промени во телото. Ако забележите дека крварењето во текот на циклусот значајно е засилено или пак намалено, спомнете му го тоа на својот гинеколог. Таквите промени може да бидат причинети од хормонални проблеми, но и од цисти или инфекција. Истото важи и за нередовните месечни циклуси.
Ако почувствувате необичен мирис
Малите промени на мирисот во текот на месечниот циклус се нормални, но непријатен мирис кој се чувствува дури и по туширањето, може да биде показател на одредени промени во организмот и затоа овој проблем, секако, треба да му го кажете на гинекологот. Непријатниот мирис може да биде показател на pH дисбалансот на слузницата, но и на инфекции или габични или вирусни заболувања.
Ако планирате бременост
Планирањето на бременост на гинекологот треба да му се спомене што побрзо. Поголемиот број жени на тој потег се одлучуваат дури откако нивниот план не успеал од прв, втор или петти обид. Оваа информација на гинекологот ќе му биде многу корисна, бидејќи ако е запознаен може да ги направи сите испутвања кои се потребни за вашата потенцијална бременост да помине што посигурно. Подготовката на организмот за нова состојба е многу важна и корисна.
