Синдромот на полицистични јајници доцна се дијагностицира

Полицистичен синдром на јајчни­кот - ова е едно од најчестите хормонал­ни нарушувања кај жената. Дијагнозата се поставува при ултразвучна детекција на јајчник, кој обично е поголем од нормалниот, со многу мали фоликули, повеќе од 12 на јајчник. Кај овие жени освен присуството на цистите, присутни се и хормонални нарушувања, нередовни менструални крвавења, знаци на зголемена продукција на андрогени хормони (појава на акни, масна кожа, влакнестост), отсуство на овулации, неплодност, дијабетес.

Синдромот на полицистични јајници е хронично пореметување кое значајно влијае на плодноста кај жената. Освен со плодноста, се поврзува и со дијабетесот и депресијата, а судејќи според резултатите од најновите истражувања често е занемарен од страна на лекарите и поминува недијагностициран.

Над 1 300 жени со оваа дијагноза учествувале во истражување, односно во онлајн анкета спроведена во 32 земји. Речиси половина од испитаниците посетила три или повеќе лекари пред добивање на конечна дијагноза, а третина од жените рекле дека од моментот на барање помош до добивањето на конечна дијагноза поминале над две години. Резултатите од ова истражување се објавени во стручното списание Journal of Clinical Endocrinology & Metabolism.

Симптоми на синдром на полицистични јајници

Се проценува дека дури 18 % од жените во репродуктивниот период боледуваат од овој синдром. И покрај неговата распространетост и фактот дека е водечка причина за неплодност, овој синдром и натаму често е непрепознаен  како од страна на пациентите, така и од страна на лекарите.

До дијагноза на синдром на полицистични јајници просечно поминуваат две години и потребни се тројца доктори.

Жените кои патат од овој синдром имаат поголем ризик од физички, но и од психички проблеми. Тој се манифестира во форма на цисти на јајчниците, зголемено ниво на тестостерон во крвта и нередовен менструален циклус. Жената може да страда од неплодност, зголемена влакнетост, спонтани аборуси, главоболка, дебелина и промена на расположението.

Лекување

Освен хормонална терапија на жените им се препорачува и правилна исхрана и редовна физичка активност. Во прв план е слабеењето и намалувањето на вишокот килограми. При тоа, стручњаците се согласуваат дека е доволно намалување на пет до 10 % од телесната маса како значително би се намалиле тегобите врзани за болеста и за нормализација на циклусот. Се препорачува исхрана со мал процент на јаглехидрати и медитеранска исхрана.


Циметот како терапија?

Американски научници од Интернационалната федерација на асоцијации за плодност пред неколку години го испитувале влијанието на циметот кај синдромот на полицистични јајчници. Сите претходни студии укажувале дека циметот ја намалува инсулинската резистенција кај жените со полицистични јајчници, но дотогаш никој не го испитувал влијанието на менструалниот циклус.

Вкупно 45 испитаници со полицистични јајчници биле вклучени во студијата во текот на шест месеци, при што оние кои консумирале цимет имале редовен менструален циклус во однос на жените кои земале плацебо. Жените кои внесувале цимет во организмот во тек на шест месеци имале просечно 3,8 менструални циклуси, додека останатите испитаници имале просечно 2,3 циклуса.

Авторите на студијата заклучиле дека потенцијално е откриена нова стратегија за терапија на синдром на полицистични јајници, но следат и дополнителни истражувања на оваа тема.

Потребно е да се напомене дека жените со овој синдром често имаат ниско ниво на железо во крвта, па и на тој факт, секако, треба да обрнат внимание.