Газираните пијалаци можат во одреден процент да ја намалат плодноста и кај жените и кај мажите, открива последната студија на група истражувачи од Универзитетот за јавно здравје во Бостон. Поради тоа, тимот на лекари вклучени во истражувањето советува дека доколку една двојка сака да ги зголеми шансите за забременување со партнерот треба да размислат за ограничување на консумацијата на газираните пијалаци.
Наодите од истражувањето откриваат дека пиењето еден или повеќе газирани пијалаци секој ден е поврзано со намалена плодност кај мажите и жените, а со тоа се намалени и шансите за формирање на семејство. Меѓу другото во студијата објавена во списанието „Епидемиологија“ е наведено дека пиењето газирани сокови е поврзано и со раниот менструален циклус кај девојчињата, како и со слаб квалитет на семена течност кај машката популација.
Со цел да ја истражат потенцијалната поврзаност помеѓу газираните пијалаци и неплодноста истражувачите испитале 3 828 жени на возраст помеѓу 21 и 45 години и 1 045 од нивните машки партнери од САД и Канада во период од една година. Тимот собирал податоци за здравствената историја на испитаниците, нивниот животен стил и начин на исхрана. Жените што учествувале во истражувањето пополнувале прашалници на секои два месеца до нивното забременување или до завршување на истражувањето.
Според собраните податоци, истражувачите откриле дека пиењето газирани пијалаци е поврзано со намалувањето на просечната веројатност за зачнување и за мажите и за жените на месечно ниво за 20 %. Жените кои пиеле најмалку еден газиран пијалак дневно покажале 25 % пониска веројатност за зачнување, додека мажите кои пиеле барем еден газиран пијалак дневно имале 33 % помала веројатност за успешно зачнување со нивниот партнер.
„Најдовме поврзаност помеѓу внесувањето на газирани пијалаци и помалата плодност, која беше конзистентна по контролата на многу други фактори, вклучувајќи ги и дебелината, внесот на алкохол, кофеин, пушењето и целиот начин на исхрана“, изјави авторката на студијата д-р Елизабет Хач, професор по епидемиологија.
