Новиот полски метод може да детектира ензими во урината кои ги ослободуваат канцерогените тумори, дури и во рани фази на раст.
„Нашиот метод ни овозможува дијагностицирање на карцином на уринарниот епител во рани фази од неговиот развој. Исто така, овозможува следење на болеста и контрола дали се вратила“, истакнала Наталија Груба, научник од лабораторијата за аналитичка и биохемиска нанодијагностика на универзитетот во Гдањск.
Новиот метод е помалку инвазивен од сите досегашни дијагностички методи.
„Претходните методи се засноваа на проверка дали туморот пораснал и дали може да се види. Проблем е што во раните фази од развојот туморите не се видливи со голо око, но веќе ослободуваат ензими кои нашиот метод може да ги открие“, вели Груба.
Доколку се потврдат наодите, новиот метод ќе претставува „пробив со светска големина“.
„Тестиравме околу 800 примероци на урини и од здрави и од болни луѓе. Кај здравите точноста на дијагнозата е со околу 90 отсто, кај болните околу 80 отсто“, нагласил Адам Леснер, научник во лабораторијата на аналитички и биохемиски нанодијагностики на универзитетот во Гдањск.
Ракот на бешиката е меѓу десетте најчести видови рак ширум светот. Според податоците на Светската здравствена организација, само минатата година се дијагностицирани околу половина милион нови случаи. Многу е позастапен кај мажите.
