Помладите жени кои боледуваат од рак на дојка се изложени на поголем ризик од развој на остеопороза поради самата терапија за третман на болеста, укажува нова студија. При истражувањето се покажало дека жените со рак на дојка кои имаат под 50 години, имаат двојно зголемен ризик од развој на осетопороза и остеопенија, во споредба со жените кои не боледуваат од карцином на дојка.
Ризикот од остеопороза и остеопенија бил дури до четири пати поголем кај жените со рак на дојка кои добивале терапија за рак на дојка која го блокира производството на хормонот естроген.
Овие резултати покажуваат дека дури и младите жени имаат релативно висок ризик од губење на коскената маса при стандардната терпија за рак на дојка. Според стручњаците, она кое треба да се истакне е фактот дека во многу случаи е воочено значајно губење на коскената маса за само неколку години. Се смета дека овие резултати укажуваат на потребата од внимателно следење на здравјето на коските кај помладите жени со рак на дојка за време и по примањето на терапија за болеста.
Лекувањето на ракот на дојка може да поттикне предвремена менопауза по оштетување на јајчниците или некој друг начин на прекин на производството на хормонот естроген.
Оваа студија покажала дека ризикот од губење на коскената маса бил особено висок по одредени видови на лекување на ракот на дојка. Жените кои примале стандардна комбинација на хемотерапија и хормонска терапија имале за 2,7 пати поголем ризик од осетопенија и остеопороза во споредба со здравите жени.
