Иако докторите го препорачуваат токму спротивното, повеќето луѓе упорно купуваат стапчиња за уши и со чистењето си го загрозуваат здравјето, тврди претседателот на Американското друштво на оториноларинголози, д-р Даглас Бакас.
Тој објаснува дека за да разбереме зошто е лошо да ги чистиме ушите со стапчиња, прво треба да разбереме која е функцијата на ушната маст. Откако восокот ќе се исуши, секое движење со вилицата при џвакање храна или говор, помага во повлекување на восокот надвор и чистење на увото, пишува „Independent“.
Проблемот се јавува затоа што луѓето мислат дека се попаметни од сопственото тело, кое е совршен механизам и се обидуваат самите да го извадат церуменот од нивните уши, а всушност, само го потиснуваат подлабоко. Ова го прави увото поподложно на инфекции, може да доведе до запушување на ушниот канал и болки.
И не само тоа, често се случува да се откачи парче памук од стапчето и да остане во увото без да биде забележано. Во видеото кое го објави д-р Крунал Караде може да се види што се случува кога во увото ќе остане цел дел од памукот.
„Луѓето не сфаќаат дека чистењето на ушите со стапчиња е опасно, а повеќето се правдаат дека го чистат само надворешниот дел од школката“, вели д-р Бакас.
За оние кои не можат да ја поднесат идејата дека нивните уши се „валкани“, докторот советува да ги мијат ушите со млака вода.
