Бебињата, кои покрај мајчиното млеко, порано почнуваат да внесуваат и друга, цврста храна, спијат подобро, покажало новото британско истражување.
Истражувачите, како што вели извештајот објавен во списанието „JAMA Pediatrics“, утврдиле дека бебињата, чии мајки, на возраст од три месеци, заедно со доењето почнале да им даваат и друга храна на своите малечки, спиеле многу подобро во споредба со бебињата кои биле само доени.
Наспроти оваа студија, препораките на Светската здравствена организација велат дека бебињата во првите шест месеци од животот треба исклучиво да се дојат.
Што се однесува до истражувањето, бебињата кои добивале и друга храна покрај мајчиното млеко, не само што спиеле подолго, туку и се буделе помалку, односно имале помалку проблеми со спиењето, што резултирало и со поголем квалитет на животот на мајките.
Со истражувањето кое го спровеле „King’s College“ и „St George’s University of London“, биле опфатени 1 303 бебиња кои биле поделени во две групи.
Првата група била шест месеци исклучиво на мајчино млеко, а на втората група бебиња почнало да им додава и друга храна на возраст од три месеци.
Родителите на децата во двете групи пополнувале секој месец прашалник за спиењето и исхраната до 12 месец на бебето, а потоа на секои три месеци до нивниот трет роденден.
Резултатите покажале највоочливи разлики на возраст од шест месеци, кога бебињата кои добивале и друга храна освен мајчиното млеко спиеле четврт час подолго во текот на ноќта (два часа подолго неделно) и се буделе во просек 1,74 пати во текот на ноќта, во однос на бебињата кои биле само на мајчино млеко, а се буделе по два пати во текот на ноќта.
Д-р Мајкл Перкин од „St George’s University of London“, истакнал дека дури и малата разлика во должината на спиењето носи голема корист за квалитетот на животот на родителите
Најзначајната разлика била во квалитетот на сонот на бебето. Оние на дополнителна храна имале 50 проценти помали шанси да плачат во текот на ноќта или да покажуваат други знаци на вознемиреност што, исто така, се причини родителите потешко да заспијат откако ќе го смират бебето.
Првата храна што родителите најчесто ја воведуваат во исхраната на бебињата е пасирано или меко варено овошје и зеленчук како што се моркови, компири, јаболка, диња или круши.
