Зголемена телесна тежина, намалена сексуална желба, несоница, различни болки… ова се некои од потешкотиите чија причина може да биде хормоналното пореметување. Важно е да се препознаат симптомите на време. Се во човековиот организам е под влијание на хормоните кои управуваат со нашето расположение, однесување и функцијата на одделни органи. Ако овој сложен систем се „расипе“, последиците можат да видат изразени во форма на поблаги или потешки здравствени пречки.
Хипоталамус
Оваа жлезда е сместена во мозокот, а управува со сексуалната желба, чувството за глад, жед, телесната температура, дишењето, срцевиот ритам. Посебно е важна затоа што делува како внатрешен часовник на организмот и управува со сите животни функции.
Пореметувања: Се толкуваат еднакво како и пореметувањата на хипофизата, со оглед на тоа дека збирот од меѓусебни делувања се нарекува хипоталамус-хипофиза.
Епифиза
Оваа жлезда е сместена во самото средиште на мозокот, а нејзината улога е поприлично непозната. Најпознатиот хормон кој произведува е мелатонинот, хормон кој управува со циклусите на сон и будност.
Пореметувања: Познато е дека влијае на репродукцијата на животните, но пореметувањата и нивните последици не се познати кај луѓето.
Штитна жлезда
Сместена е во дното на вратот. Произведува хормони кои влијаат на растот, производството телесна енергија и брзина на метаболичките процеси во телото.
Пореметувања: Се разликуваат во зависност од тоа дали штитната жлезда работи пресилно или преслабо. Кај послабата работа се јавува забавеност на метаболизмот, кај силната забрзаност. За двете пореметувања карактеристично е биење на срцето, слабеење на ноктите и косата, пореметувања на менструалниот циклус, нагли промени на телесната тежина.
Паратироидна жлезда
Станува збор за четири мали жлезди кои се наоѓаат покрај штитната, а произведуваат хормони кои влијаат на метаболизмот на калциум.
Пореметувања: Заради недоволна работа може да дојде до појава на чувство на морници, губење на чувството во стапалата и дланките, а во критични случаи и до привремена парализа. Кај прекумерната работа може да дојде до создавање на бубрежни камења или скршеници.
Панкреас
Се наоѓа во горниот дел од стомачната шуплина. Нејзината функција е контрола на нивоата на шеќер во крвта и отпуштање на хормоните инсулин и глукагон.
Пореметувања: Најчест симптом е промената на телесната тежина, постојано чувство на жед, малаксаност и други знаци кои упатуваат на појава на шеќерна болест.
Надбубрежна жлезда
Се наоѓа над бубрезие, а се дели на средишен дел и кора. Одговорна е за производство на хормоните кортизон и кортизол, но заслужна е и за мало количество машки и женски полови хормони, како и хормонот на стрес – адреналин.
Пореметувања: Кај засилена работа доаѓа до прекумерно создавање андрогени стероиди, односно тестостерон и слични хормони. Тогаш доаѓа до зголемена влакнетост кај мажите и жените, појава на акни, пореметување во менструалниот циклус…
Јајници
Овој парен орган е задолжен за репродукција, но и за одржување на рамнотежата во половите хормони кои ги произведува. Јајниците го регулираат менструалниот циклус, овозможуваат созревање и отпуштање на јајце-клетките, па произведуваат хормони естроген и прогестерон.
Пореметувања: Најчесто се работи за синдром на полицистични јајници, за кој е типичен нерегуларниот – скратен или продолжен менструален циклус, зголемена влакнетост, појава на акни, неплодност и дебелеење околу стомакот.
Тестиси
Машки полови жлезди кај мажите кои се еквивалент на јајниците кај жените, а нивната примарна улога е производството на сперматозоиди и машки полов хормон тестостерон.
Пореметувања: Најчесто се врзуваат за пореметувања во други жлезди, а резултатот е намален број на сперматозоиди и неплодност. Симптомите на ниско ниво на тестостерон се намалено либидо, низок волумен на сперматозоиди, губење коса, замор и недостаток на енергија, губење мускулна маса како и изостанок или слабеење на ерекцијата.
