Голем број луѓе во текот на животот се подложуваат на неопходен оперативен зафат, кога како компликација од претходно хируршка интервенција се појавила постоперативна кила. Сите кои се зафатени со оваа состојба имаат многу прашања, каква е таа операција, колку трае, кои се индикациите и компликациите? Ова се лекарски одговори на неколку прашања поврзани со постоперативната хернија.
Постоперативна (инцизионална) кила (хернија) претставува стекнат дефект на стомачниот ѕид по хируршка интервенција во пределот на оперативниот рез.
Причини за оваа појава има многу: природата на основната болест, инфекција на оперативната рана, зголемен притисок во стомакот, кашлица и напрегање во постоперативниот период, прерано враќање на физичките активнсоти, старост на пациентот, гојазност или недоволна ухранетост, примена на одредени лекови, неадекватен хируршки материјал и друго. Со стареењето и зголемување на бројот на хируршки интервенции, се зголемува и бројот на постоперативни кили кои претставуваат сериозен здравствен и социјален проблем.
Се смета дека околу 5% од оперираните пациенти развиваат постоперативна кила.
Единствена терапија за оваа состојба е хирушка. Постојат бројни техники кои во основа се сведуваат на враќање на содржината на ќесата на килата во стомакот и затворање на дефектот. Хирургот избира која техника ќе ја употреби во зависност од големината на дефектот, состојбата на ткивата и други фактори.
