Кила или хернија претставува испакнување на перитонеумот надвор од стомачната шуплина, во која можат да бидат и делови на стомачните органи. Надворешната кила се испупчува низ стомачниот ѕид под кожата низ преформирани отвори (килна врата) или низ отвори настанати од повреда, операција и сл. Испупчениот дел на перитонеумот (килна вреќа) поминува низ вратата или каналот на килата, и во него како содржина се наоѓаат стомачните органи, најчесто црева, стомачна кошулка (марама) и др.
Иако ингвиналната хернија не претставува опасна состојба, ако не се третира на вистински начин и во вистинско време, здравствената состојба може да се искомплицира. Како дел од лекувањето се подразбира операција со која треба да се спречи препонската кила да не стане поболна и поголема.
ПРИЧИНИ
Во одредени случаи може да се јави без некоја очигледна причина, додека во други може да биде резултат на:
- Хронична кашлица или кивање;
- Зголемен абдоминален притисок;
- Прекумерна тежина;
- Напрегање при мокрење и движење на цревата;
- Бременост;
- Подигање на тешки предмети;
- Течности во стомакот;
- Слаби точки на стомачниот ѕид – најчесто се јавува при раѓање.
Поголем ризик од добивање на кила имаат оние лица кои консумираат нездрава храна и се пушачи, бидејќи може да дојде до слабеење на мускулите
СИМПТОМИ
Во одредени случаи, нема да има никакви симптоми кои би можеле да сугерираат дека се работи за кила. Таквите пациенти ќе откријат дека имаат кила дури за време на редовен преглед. Но, за разлика од ваквите случаи, повеќе се оние кои имаат некои од следниве симптоми на брух:
- Проблеми со голема нужда;
- Проблеми со мокрење;
- Отекување од обете страни на препонската коска;
- Болка во препоните за време на кашлање или подигнување на товар;
- Болка во тестисите;
- Отекување околу тестисите.
Брухот кој се јавува кај децата при раѓање е резултат на послаби стомачни мускули. Децата кои го имаат обично ќе бидат нервозни и ќе плачат додека ги допирате по болните места, како и за време на кивање и извршување нужда.
Килата кај најмладите може да се забележат во моментите кога се напрегаат при извршување нужда, но и кога плачат. Зголемен ризик имаат оние деца кои се родени предвреме и чии тестиси се уште не успеале да се спуштат од стомакот во скротумот. Ако забележите дека вашето дете има кила, потребно е веднаш да се јавите на лекар.
Кила кај жените
Кила кај жени не е толку честа појава, а обично се јавува како резултат на послаби стомачни мускули. Покрај зголемени активности, кои може да резултираат со појава на брух, причина за кила може да биде и бременоста, како и дебелината.
Препонска кила кај мажите
Хернијата се јавува почесто кај мажите, главна причина е изложувањето на поголем физички напор. Постојат неколку причини зошто е почеста кај мажите отколку жените, а тоа е природата на работите кои ги извршуваат, како и спортските активности со кои се занимаваат во слободното време.
ЛЕКУВАЊЕ
Лекувањето на кила зависи од тоа колку е голема и дали влијае на секојдневен живот. Ако хернијата почне да ја менува големината и се појават болки, пациентот најверојатно ќе мора да се подложи на операција за да се спречат компликации. Ако се работи за мала хернија која не создава проблеми, ќе се предложи следење на состојбата.
