Консумирањето на поголеми количини зеленчук може да им помогне на повозрасните жени да го зачуваат здравјето на крвните садови, покажала новата австралиска студија. Најголемата корист за здравјето на крвните садови е забележана при консумирање на зеленчук од семејството на зелки (Brassicaceae), како што се брокула, рукола, зелка, ротквица, карфиол, кељ, прокељ.
Жените кои го консумирале споменатиот зеленчук во големи количини имале помало задебелување на каротидните артерии, кои се наоѓаат во вратот. Инаку, задебелувањето на овие крвни садови е знак за претстојна болест на срцето.
Овие резултати ја нагласуваат важноста на внесот на зеленчук, за да се намали ризикот од атеросклероза, срцев удар и мозочен удар, истакнуваат експертите.
Нивните препораки се дека секој човек треба да консумира најмалку неколку порции зеленчук од семејството на зелки во текот на неделата. Освен што е богат со влакна, овој зеленчук, исто така, содржи многу витамини, минерали и фитохемикалии кои го намалуваат воспалението и оксидативниот стрес. Познато е дека хроничното воспаление игра улога во многу болести кои се јавуваат кај постарите лица, вклучувајќи ги и срцевите заболувања. Исто така, е познато дека воспалението игра голема улога во настанувањето на атеросклерозата, пишува „Journal of the American Heart Association“.
