Пуканки, суво овошје, газирани пијалаци се само дел од палетата на намирници кои имаат лоши последици врз забите: го уништуваат емајлот, предизвикуваат кариес, а можат и да ги скршат забите. Ако сакате забите да ви останат здрави, подобро да ја одбегнувате оваа храна, советуваат американските стоматолози.
Пуканки
Повеќето луѓе кои доаѓаат во ординација со скршени заби велат дека тоа им се случило додека јаделе пуканки. Често пуканките не се отвораат сосема, а тврдите зрна многу лесно ги кршат забите, да не зборуваме, пак, за лушпите кои се пикаат помеѓу забите и предизвикуваат болка во непцата, објаснува Џонатан Неман, стоматолог од Њујорк.
Суво овошје
Иако е многу фино, полно со витамини и минерали, сувите плодови се ужасно лоши за забите. „Не само што е во прашање концентриран шеќер, исто така, е многу леплив и често се лепи за забите и создава кариес“, вели д-р Неман.
Благо кафе
Честото пиење слатко кафе, како што е она од автомат, е „кошмар“ за забите. Постојаната изложеност на забите на шеќер и млеко во кафето ја отежнува борбата на плунката против шеќерите и киселината во устата.
Плунката е фантастичен заштитник на забите, но со долготрајно консумирање на благи пијалаци забите се под постојан напад на шеќерот. Со текот на времето, плунковните жлезди едноставно не можат да „држат чекор“ со износот на шеќер во устата и нивната работа се успорува, па плунката повеќе не може да ја извршува својата работа, додава д-р Неман.
Семиња
Повеќето семиња бараат отворање со предните заби, што може да предизвика оштетување и кршење на забите.
Топла вода со лимон
Ако сте слушнале дека топлата вода со лимон е добра замена за утринското кафе, уште еднаш размислете.
Киселината од лимонот ги уништува забите, бидејќи го нагризува емајлот. Постојаната изложеност на кисели пијалаци може да го раствори емајлот, слабеејќи го внатрешниот слој на забот (дентинот), кој е многу почувствителен, објаснуваат стоматолозите. Прекумерната консумација на цитруси, односно премногу киселина ги оштетува забите, исто како и шеќерот.
МРАЗ
Немојте да јадете мраз! Премногу е тврд, го оштетува забниот емајл и предизвикува ситни оштетувања на забите. Може дури и да скрши поголем дел од забот, предупредува американскиот стоматолог Јон Мараши
Енергетски пијалаци
Енергетските пијалаци се многу кисели и имаат ниска pH вредност и висока содржина на шеќер. Сведоци сме на пораст на расипувањето на забите кај студентите кои пијат премногу вакви пијалаци за да може да ја поминат ноќта будни. Поради својата густина и зголемен шеќер, овој пијалак ги прекрива сите заби подеднакво и создава опасност од кариес, велат стоматолозите.
Суво грозје прелиено со чоколадо
Самото чоколадо врз сувото грозје е помалку штетно за забите отколку сувото овошје. Сувото грозје има висока количина шеќер и лесно се лепи на забите.
Спортски пијалаци
Овие пијалаци се дизајнирани за спортисти за рехидратација. Тие помагаат да се надополнат изгубените хранливи материи и електролити во организмот. Од друга страна, спортските пијалаци се полни со течен шеќер, кој е познат по тоа што создава кариес на тешко достапните заби, објаснува Криста Менинг, сопственичка на забна лабораторија во Кентаки.
Леб со пармезан или путер од кикиритки
Обата намази се преполни со шеќер, густи се и многу лепливи, што е рецепт за кариес. Ако ви се допаѓаат овие намази, побарајте ги оние со пониска содржина на шеќер и по оброкот напијте се чаша вода. Ако можете, после јадењето, земете гума за џвакање со пеперминт, која со џвакање ќе го симне поголемиот дел од шеќерот на забите, советува Менинг.
Конзервирано овошје
Ако мислите дека оваа намирница е здрава храна, бидејќи се работи за овошје, размислете повторно. „Иако овошјето обично се смета за здраво и пожелно, конзервирано е многу нездраво, бидејќи е пакувано во сируп и течен шеќер“, објасни Менинг.
Гумени бонбони
Не само гумените бонбони, туку и сите слични слатки треба да се избегнуваат. Тие се страшни за вашите заби, бидејќи многу се лепат и за забите и за непцата, а колку подолго гумените бонбони се залепени на забите толку повеќе предизвикуваат нивно расипување, вели козметичкиот стоматолог Лоренс Фунг.
Скара
Не станува збор толку за месото, колку за сосовите за скара, кои инаку се густи, лепливи и изобилуваат со шеќери. „Ребра од скара во сос со карамелизиран шеќер и зачини е најлошата храна за вашите заби. Постои ризик од кршење на забите, а дополнителниот шеќер никогаш не е добар“, предупредува сопственикот на приватна стоматолошка ординација во Њу Џерси, Фредерик Бејкер.
