Акутниот синузит може да биде предизвикан од настинка, алергија, грип или од бактериска инфекција на горните дишни патишта. Бактериите се најчесто причинител на акутен синузит кај возрасните, а во помал процент кај децата. Важно е навреме да се препознае болеста на синусите, да се почне лекување за да не дојде до влошување на состојбата и да се зафатат белите дробови и бронхиите.
Симптоми
Типични симптоми на синузит се затнат нос и зголемен секрет, чувство на притисок и болка во делот на зафатени синуси, како и главоболка. Главоболката често се засилува со нагли движења и промена на положбата на главата. Симптомите на болка зависат од тоа кој синус е најмногу зафатен со воспалението. Така, може да се јави и болка во увото, во вратот, забоболка, губење на чувството за мирис, солзење на очите. Воспалението на синуси може да биде проследено и со висока температура и со малаксалост. Во раната фаза симптомите тешко се разликуваат од симптомите на обична настинка или алергиски ринитис, а заеднички им се главоболка и висока температура. Неретко може да дојде и до појава на гноен исцедок од носот. Од општи симптоми најчести се изразен замор и исцрпеност.
Синусна главоболка и мигрена
Повеќето симптоми на синусна главоболка се слични со останатите видови на главоболка, болка во челото, околу очите и носот. Но, она што ја разликува синусната од останатите главоболки е инфекцијата. Синусната главоболка се јавува како резултат на воспаление на синусите, додека мигрената на пример е предизвикана од друг причинител. За да се ослободите од синусната главоболка мора да водите сметка и за воспалението. Кога ќе почне да се лекува тоа, главоболката ќе почне да исчезнува.
Акутен и хроничен синузит
Акутниот синузит е секое воспаление на синус која трае до 30 дена. Ако состојбата не се излекува, кај долготрајната состојба на затнат нос и качлање, зачестува појава на висока температура и упорен гноен исцедок од носот кој тече во ждрелото.
Хроничниот синузит може да се развие како последица на често повторување на акутни воспаленија на синусите, особено ако не се лекувани и тгретирани соодвтено. На него се склони лица со различни ризик фактори како што се девијација на носниот септум, некои хронични болести кои ја намалуваат отпорноста на организмот кон инфекции. Доколку воспалението на синуси трае до 12 недели, голема е веројатноста дека станува збор за хронично воспаление кое треба да се лекува оти во спротивно може да дојде до компликации.
