При купување мед може да направите брза анализа: растворете лажица мед во чаша вода. Доколку медот добар и природен, без додаток на шеќер или сируп, растворот треба да биде матен, но без талог. Доколку се појави талог значи дека станува збор за неприроден, лажен мед.
Ако медот не е природен, туку пчелите се хранети со шеќер, медот ќе мириса на восок и нема да има никаков одреден мирис. Исто така, ќе биде со светложолта боја, без добар вкус и ќе биде преблаг. Ако пчелите се хранети со шеќерен сируп, медот ќе биде неприродно светол. Ако е премногу светол можеби е во прашање мед со додаден шеќер. Присуството на скроб во медот може да се познае ако во медот капнете само една капка течен јод. Лажниот мед веднаш ќе посини. Ако медот е премногу темен, со слаба арома или со вкус на карамела, значи дека е е претопуван. Претопен е и кога е течен на ниска температура.
Конзистенцијата на медот мора да биде густа, но не премногу. На температура од 20 степени Целзиусови и повеќе, медот мора да се намотува на лажицата како конци. Ако е претечен, значи дека е незрел, полн со вода и може да се укисели.
Пожелно е секогаш да го прашате продавачот каде и кога е собиран медот, како и од кој вид билка е. Задолжително погледнете ја декларацијата. На неа треба да пишува стандард, сорта, ботанички вид на медот, време и место на собирање, како и име и адреса на пчеларот.
