“Идејата да на овој конгрес се презентираат најновите податоци и најновите резултати од голем број студии од областа на алергологијата и клиничката имунологија во целост се исполни, бидејќи имавме голем број посетители во салите каде се предаваше, и тоа не само од нашата земја, туку и колеги од Бугарија, Србија, Хрватска и Косово. Сето тоа говори дека беше ова уште еден успешен когрес, со многу успешни содржини кои се понудија на слушателите. Од друга страна, гостин ни беше потпретседателот на Европската Академија за алергологија и клиничка имунологија, проф Анти Лауерма кој е професор во Финска кој ни укажа на сите можности и бенефити што ние можеме како членови на академијата да ги добиеме, а за кои сметам дека младите треба да ги искористат. Особено оние до 35 години, бидејќи академијата нуди можност за голем број на грантови, било за посета на некој друг универзитет или за едногодишен престој во некој научно истражувачки центар„, изјави претседателот на Здружението, проф. д-р Дејан Докиќ при денешното затворање на четвртиот конгрес, кој три дена траеше во Охрид.
Она што особено ми причинува задоволство, потенцира проф. д-р Докиќ е што посебен акцент имаше анафилаксата, која се години е слаба алка во нашиот здравствен систем поради тоа што голем број лекари не знаат како, во кој доза и по кој редослед да го дадат адреналинот, но сето тоа тука на конгресот се објасни и се одговорија безброј прашања. Освен тоа, на настанот беа презентирани и најновите водичи за терапија на астма, на ХОББ, на уртикарија и други болести, кои беа презентирани и прецизно објаснети.
“Конгресот беше организиран на светско ниво, во преубавиот Охрид, на прекрасно место со комплетна логистика. Навистина сум благодарен за можноста да бидам тука во Охрид, на овој стручен и професионален настан. Презентациите и предавањата беа со врвен квалитет на највисоко научно ниво, а особено сум задоволен од интеракциите на слушателите и колегите воопшто. Можам слободно да кажам дека Македонија во овој дел на медицината, кога станува збор за алергологијата и клиничката имунологија е на многу високо ниво и ги следи сите трендови на дијагностика и лекување на заболувањата врзани за овој сегмент“, изјави проф. д-р Анти Лауерма, потпретседател на Европското здружение за алергологија и клиничка имунологија.
А. Стојановска
