Научниците од Националниот совет за истражување во Шпанија, препорачуваат корисниците на јавен превоз меѓусебе да не разговараат или да не зборуваат на мобилен телефон за време на возењето, за да на тој начин се спречи ширењето на коронавирусот.
Тие, своето мислење го образложиле со податоците според кои, воведувањето на таквата мерка, може значајно да го намали ризикот од инфекција.
Стручњаците за епидемиологија и аеросоли од целиот свет со месеци наназад од своите влади бараат пооштри мерки за да се спречи ширење на инфекцијата преку воздух.
Покрај одржувањето физичко растојание, лична хигиена и секојдневно носење на маска, познато е дека вентилацијата е една од клучните мерки за спречување на инфекции со новиот коронавирус.
Докажано е дека вирусот може да се пренесе преку аеросоли, поради што во повеќето објекти, како училиштата, прозорите треба да се држат отворени за да просторот во кој престојува поголем број на лица, непрекинато се проветрува.
Научничката од Националниот совет и стручњак за атмосферски аеросоли, Марија Круз ја истакнува важноста од проветрување на прсториите, но смета и дека би било добро да се почитува уште една мерка – молчење, односно да не се разговара за време на возење во јавен превоз. Таа вели дека би било идеално кога на влезот во било кој јавен превоз, би пишувало ‘Ве молиме за тишина“.
Круз појаснува дека “молчењето заедно со правилното носење маска, придонесува за минимален ризик од пренесување на коронавирусот“. Токму затоа им препорачува на корисниците на јавен превоз да не разговараат меѓусебе, ниту на мобилен телефон.
“Ако разговараме гласно со некого или на мобилен телефон за време на возење во јавен превоз, каде нема добра вентилација, емитираме 50 пати повеќе аеросоли“, појаснува таа.
