Причината за појава на трепкање или народски кажано играње на окото не е позната. Миокимијата на очниот капак може да се појави во долниот дел на окото или на горниот капак. Се нарекува уште и пореметување на трепкањето. Во поголемиот број случаи ова не е голем медицински проблем и често поминува само од себе. Може да помине и без да се дознае причинителот.
Миокимијата претставува спонтана, фасцикуларна контракција на мускулот во отсуство на мускулна слабост и атрофија.
Појавата на миокимијата може да се поврзе со претходен стрес, премор и прекумерно консумирање на кофеин и на алкохол. Оваа појава често може да е предизвикана и од долготрајно седење пред компјутер, долго читање, гледање телевизија, прекумерна употреба на мобилен телефон, играње игри пред телевизор или компјутер, односно сите дејства кои очите ги изложуваат на долготраен напор и замор.
Состојби кои предизвикуваат трепкање на окото:
- Алкохол;
- Кофеин;
- Замор и стрес – ова се главни причинители на трепкање на окото. Поработете на опуштање, дозволете си малку повеќе сон и обидете се да ги одморате очите што е можно повеќе;
- Иритација на површината на окото или внатрешноста на капакот;
- Недостаток на сон;
- Физичко оптоварување;
- Пушење.
Клиничка слика
Најчесто се јавува миокимија на мускулот на очниот капак. Болниот чувствува спорадично потскокнување или грчење на едниот од долните очни капаци. Може да бидат зафатени и горните капаци. Главно контракциите не се многу силни и интермитентно се појавуваат. Ретко контракциите се толку силни што предизвикуваат движење на очното јаболко и доведува до состојба која наликува на нистагмус. Доколку се јават и контракции на други мускули на лицето може да се појави и блефарозпазам, стеснување на палпебралните отвори, бранување на површината на кожата на лицето (кое се опишува како вреќа со црви), спазам на половина на лицето и спастични контрактури на лицето.
Лекување
Доколку се идентификуваат ризик факторите неопходна е нивна редукција или емилинација. Главно лекување не е потребно. Инјектирањето на ботокс дава извесно олеснување.
