Луѓето главно знаат што е псоријаза и оние кои ја имаат таа несреќа да заболат од неа знаат какви проблеми предизвикува и како изгледа. Во основа болеста се карактеризира со црвени суви печати со сиви острови на сува кожа, кои можат да се јават каде било по кожата. Тие печати, меѓутоа може да зафатат и дел околу зглоб, но и да продрат длабоко во ткивото под кожата, со што се прошируваат и на зглобовите и тогаш настанува еден вид на артритис – псоријазен или псоријатичен артритис.
Како и за псоријазата така и за псоријазниот артритис, за жал, нема лек, но ако болеста не се држи под контрола може да влијае на намалување на подвижноста на зглобовите, а потоа да се прошири и на очите каде што се јавуваат често конјунктивитиси и солзење на очите, а потоа болеста може да се пренесе и на кардиоваскуларниот систем. Додуша, болеста има свои фази на смирување и буење, но без некој јасен причинител, па тешко е да се контролира нејзиното појавување.
Иако псоријазниот артритис може да се јави на кој било зглоб, најчесто го зафаќа зглобот на лактот, а мошне често пациентите се жалат на промени на зглобовите на прстите. Може, исто така, да се јави и како паралелен симптом, но може да зафати и само една страна.
Првите симптоми се како и кај многу други заболувања на зглобовите, заради што мошне често погрешно се дијагностицира. Прво се јавуваат отоци и болки во зглобовите, понекогаш отекува и целата дланка или се јавува необична болка во грбот. Најлесно заболувањето може да се дијагностицира кај личностите кои веќе имаат псоријаза и во тој случај лекарот однапред ќе го подготви пациентот на оваа можност. Некогаш, меѓутоа псоријазниот артритис се јавува и пред симптомите на псоријаза.
Како и самата псоријаза, псоријазниот артритис е болест на имунолошкиот систем, но овој пат ги напаѓа ќелиите на поткожното ткиво кое го обвива зглобот. Причините освен наследниот фактор се и одредениот стил на живот и стресот. Најчесто се јавува кај лица на возраст меѓу 30 и 50 години. Некогаш делуваат обичните лекови против воспаленија и болки во зглобовите, но инаку кај псоријазата и артритисот се советува специјален диететски третман, кој докажано дава позитивни ефекти.
Исхрана кај псоријазен артритис
Кога се почнува со режимот на исхрана наменет за оваа болест, лекарите прво советуваат да се намали телесната тежина, затоа што масното ткиво ги засилува воспаленијата. Како и кај обичниот артритис, треба да се избегнува се што ги засилува воспаленијата – црвено месо, преработен шеќер, брза храна, домати, модар патлиџан и компир. Место тоа се консумира лосос, спанаќ, кељ и боровинки, кои докажано се природен лек против воспалени зглобови.
Некои доктори препорачуваат палео диета, која подразбира одбегнување на преработена храна, грав, кисело млеко. Палео диетата всушност се базира на исхраната на пештерскиот човек, така што се исклучува се што е преработено или одгледано на модерен начин. Други велат дека медитеранската диета дава добри резултати затоа што е богата со омега-3 масни киселини. Тоа подразбира да се јаде риба и варен зеленчук, а храната се подготвува со маслиново масло (православниот пост е најблизок до медитеранската диета).
Да се намали глутенот, зашто докажано е дека ги засилува симптомите на болеста. Иако е тешко од исхраната целосно да се исфрли, но барем доволно би било да се сведе на минимум
Природно лекување на псоријазниот артритис
Освен исхраната лекарите препорачуваат и низа природни решенија кои, докажано, ако веќе не можат да ја излекуваат болеста, барем ги намалуваат симптомите и ги ублажуваат болката и отоците.
- Некои од нив се: иако можеби делува контрапродуктивно кај ова заболување треба да се вежба зашто така се одржува подвижноста на зглобовите. За таа цел се препорачува јога, пливање и таи чи, односно вежби кои ја зголемуваат подвижноста на зглобовите, но без претеран притисок и оптоварување за организмот.
- Некои пациенти откриле дека им годат и масажа, акупунктура, акупресура.
- При болки, исто така, може да помогне и наизменично сменување на студени и топли облоги на зглобовите. Тоа значи дека и буквално треба да се става што е можно потопла, врела, облога, а потоа мраз. Се разбира, само доколку тоа му годи на пациентот.
- Исто така, кај некои помага и благото загревање на зглобовите. Тоа може да се постигне со термофор или електрично ќебе. Не треба да се прегрева зглобот, туку само благо да се загрее. На други, пак, повеќе им годи благо ладење. Пробајте го и одберете го она што ви одговара.
- Природните лекови кои можат да се воведат во исхраната се луто пиперче, сол од Мртвото Море, овес, железо и куркума.
- На кожата, исто така, може да се нанесуваат природни препарати како алое вера, јаболков оцет, масло од чајно дрво. Сите тие го подобруваат крвотокот и така ја поттикнуваат прокрвеноста на зглобовите, што повторно доведува до намалување на болката и отоците.
