Австралиските научници развиле тест за рана детекција на меланом.
Тестирањето преку крвта го олеснува откривањето на ракот на кожата пред да поприми смртоносен облик. Лекарите досега се потпираа на преглед на кожата и биопсија за откривање на меланом, но недостатокот на овој вид на преглед е што меланомот може брзо да се прошири.
Научниците тврдат дека испитувањето на крвта може да даде попрецизни резултати од прегледот на кожата и на тој начин да спаси многу животи.
Тестот, кој го развиле научниците од Универзитетот „Edith Cowan“, го открива меланомот со препознавање на антителата, кои ги произведува организмот во борбата против растот на карциномот.
Во истражувањето во кое учествувале околу двесте луѓе, а од кои половината имале рак, тестот се покажал како успешен во 81,5 % од случаите
Клиничките испитувања на тестот ќе траат 3 години, време во кое треба да се постигне 90-отстотна точност на тестот. Научниците се надеваат дека ваквиот облик на тестирање би можел да биде одобрен за употреба во наредните пет години.
Иако лекарите – специјалисти се добро обучени за идентификување и откривање на меланом, професорката Мел Зиман, водач на екипата научници кои го развија овој тест, вели дека тестот би можел да го забрза поставувањето на дијагнозата: „Во рутинската клиничка пракса, понекогаш е тешко да се направи разлика помеѓу меланом во рана фаза и младеж“.
Откривањето на меланом во рана фаза носи 98-99 % шанси за преживување, па затоа развојот на тестот на крвта за откривање на меланом е голем успех, пишува „Sciencealert“.
