Имајќи предвид дека хипертензијата претставува фактор на ризик за разно-разни кардиоваскуларни заболувања може да изгледа дека нискиот притисок всушност е добра работа. Хипотензијата меѓутоа може да биде причина за непријатни симптоми како што се недостаток на енергија, поспаност, замор, лоша концентрација, вртоглавица, па дури и несвестица. За хипотензија обично се зборува кога крвниот притисок е понизок од 90 mmHg со 60 mmHg, но доколку оваа состојба не ја следат претходно споменатите симптоми, тогаш нискиот крвен притисок главно не се смета за здравствен проблем.
Кај повеќето луѓе со хипотензија, крвниот притисок е можно да се регулира со промена на одделни животни навики. За почеток, не ја одбегнувајте солта – иако со цел превенција на кардиоваскуларните тегоби се советува ограничување на солта во исхраната, личностите со низок крвен притисок би требало да се држат до препораките за внес на сол (1 лажичка сол или 2 300 мг натриум дневно). Исто така, одбегнувајте алкохолни пијалаци, бидејќи алкохолот може дополнително да го намали крвниот притисок.
Потрудете се да пиете многу вода и да јадете помали, а почести оброци во текот на денот. Еден од наједноставните начини да го зголемите крвниот притисок е да ги прекрстите нозете додека седите. Избегнувајте нагли промени на положбата – наглото станување може да предизвика чувство на слабост, вртоглавица, па дури и несвестици кај личностите со хипотензија.
Нискиот крвен притисок, исто така, може да биде несакан ефект од терапија со одделни лекови – доколку симптомите на хипотензија се јавиле по почетокот на лекувањето со нов лек за овие промени обавезно известете го вашиот лекар.
