Решавањето на IQ тест (тест за интелигенција) не мора да биде маратон со прашања. Всушност, најкраткиот тест за IQ во светот се состои од само три прашања. Може да го решите веднаш и да се пофалите со резултатите. Се разбира, доколку се за фалење!
Трик прашања
Когнитивниот тест за рефлексија (Cognitive Reflection Test, CRT) го развил психологот Шејн Фредерик во 2005 година. Во трудот објавен во „The Journal of Economic Perspectives“ Фредерик објаснува дека избрал три прашања за тестот, бидејќи за сите три „било откриено дека предизвикаат импулсивно погрешни одговори“. Односно, прашањата се такви што луѓето брзо донесуваат заклучоци, наместо внимателно да ги анализираат навидум едноставните прашања.
Поради овој ментален трик, сосема малку луѓе успеваат да одговорат на сите три прашања правилно. Почнувајќи од јануари 2003 година, CTR го решиле 3 428 испитаници во 35 одделни студии во период од 26 месеци. За време на експериментот, само 17 проценти од студентите од најдобрите универзитети во светот (како Јеил и Хардвард) постигнале совршен резултат на CRT тестот. Врз основа на резултатите на овој 26-месечен експеримент, Фредерик го претстави CRT на светот во 2005 година. Овој краток тест е дизајниран за да ја тестира способноста на човекот да го игнорира својот интуитивен одговор и да размислува рационално. Обидете се да одговорите на овие прашања, а подолу може да ги проверите своите одговори. Без брзање!
Еве ги прашањата:
- Проблем на палка и топче
Палката и топчето заедно чинат 1,10 долари. Палката чини 1 долар повеќе од топчето. Колку чини топчето?
- Проблем на машината за значки
Ако е потребно 5 минути за 5 машини да направат 5 значки, колку време ќе биде потребно за 100 машини да направат 100 значки?
- Проблем на двојно зголемување на водните кринови во езерото
Во езерото има голем број на водни кринови. Секој ден, површината на криновите двојно се зголемува. Ако е потребно 48 дена за криновите да го покријат целото езеро, колку време им е потребно на криновите за да покријат половина од езерото?
Лизгајте надолу за да ги прочитате одговорите на прашањата.
.
.
.
.
.
Еве ги одговорите:
- Топчето чини 5 центи. Најверојатно одговоривте 10 центи, нели? Топче кое чини 5 центи и палка која чини 1,05 долари, заедно чинат 1,10 долари. А 1 долар и 5 центи е точно за 1 долар поскапо од 5 центи. Студијата од Принстон покажа дека луѓето кои одговориле 10 центи биле многу понетрпеливи од оние кои одговориле точно.
- За 100 машини да направат 100 значки, потребни се 5 минути. Вашиот интуитивен одговор веројатно бил 100 минути. Од прашањето знаеме дека на една машина и треба 5 минути да направат 1 значка. Значи, потребни се 5 минути за 100 машини да направат 100 значки.
- Криновите ќе покријат половина од езерото за 47 дена. Можеби сте одговориле 24 дена? Интуитивно се преполовува бројот на денови бидејќи е преполовена и големината на површината на криновите. Меѓутоа, ако површината на езерото што ја покриваат криновите се зголемува двојно секој ден, потребно е само еден ден од половина покриеност да дојде до целосна покриеност на езерото. Одземете еден ден од 48 дена и ќе добиете 47 дена.
