И пудингот може да биде здрав, доколку се приготвува со додаток на квалитетни намирници, како што се семе од чиа, овошје и какао во прав.
Со семето од чиа секоја течност може да се претвори во вкусен пудинг. Станува збор за супернамирница од растително потекло која е богата со омега-3 и омега-6 масни киселини, протеини и диетални влакна.
Консумацијата на овие намирници го намалува нивото на лош холестерол во крвта, го поттикнува варењето и обезбедува подолга ситост. Затоа овој пудинг е одличен сојузник во исхраната на луѓето кои сакаат да ослабат на здрав начин или да ја одржат својата тежина.
Доколку се измеша со здрави извори на шеќер како банана или урми и органско какао, се претвора во вкусен појадок, ужинка или десерт.
Потребни состојки за чоколаден пудинг од семе од чиа:
- 150 мл млеко од оревкасти плодови по желба
- 2 лажици семе од чиа
- 2 лажици сурово какао во прав
- 2 зрели банани
- 1/4 чајна лажичка екстракт од ванила (по желба)
Подготовка:
Ставете го семето од чиа во млекото од оревкасти плодови и оставете да набабри околу 20 минути. Можете да употребите и оризово и кокосово млеко па дури и вода.
Кога семето од чиа ќе набабри ставете го во блендер, додадете ги бананите, какаото во прав и екстрактот од ванила. Мешајте се додека не добиете глатка смеса.
Пудингот ќе биде посладок ако искористите зрели банани полни со шеќер, а наместо банана можете да изблендирате и парчиња урми или некое друго овошје по желба.
Декорирајте го пудингот со оревкасти плодови по желба.
Совет: Пудингот ќе има уште подобар вкус ако го оладите во фрижидер пред да го консумирате.
