Кога е во прашање храната за бебињата, важно е да се исполнат два чекори за оброците да бидат подготвени!
- Поголемиот дел од зеленчукот доволно е да се свари и стави во блендер, но намирниците како компирите, цвеклото или морковите можат и да се испечат, се разбира, доколку имате малку повеќе време.
- Исто така, овошјето како што се бананите, авокадото и боровинките не бараат посебна подготовка пред блендирањето, додека јаболката и крушите немаат толку мека внатрешност, па би било добро ако се сварат.
Без оглед на тоа дали сте решиле да ја варите или печете храната, потрудете се да ги исечкате намирниците на еднакви парченца, за се во исто време да биде готово. Освен тоа, бидете внимателни околу блендирањето на врелата храна – оставете ја прво да се излади.
Со оглед на тоа дека тиквата е највкусниот есенски плод и ја има во изобилство, направете му го на вашето бебенце највкусниот оброк токму со неа. Тиквата уште и изобилува со лековити состојки и токму заради тоа е пожелна во исхраната, особено на бебињата.
Кашичка од тиква и јаболка
(може да се воведе во исхраната после навршени 6 месеци)
Потребно: 1 јаболко, парче тиква и 1/2 лажица пченкарен гриз
Приготвување: Тиквата и јаболкото се чистат и се сечкаат на коцки, потоа се ставаат да се варат во тенџере со малку вода. После десетина минути се додава пченкарниот гриз и се заедно се вари уште неколку минути. По потреба се додава уште малку вода, ако гризот го згусне јадењето. Кашичката се блендира или се пасира со виљушка.
Кашичка од тиква, карфиол и кељ
(Содржи многу хранливи состојки, има одличен вкус, кремаста структура и брзо и лесно се приготвува. Можете да му ја послужите на вашето бебе после наполнети 10 месеци)
Потребно:тиква, карфиол, кељ, неколку капки маслиново масло
Приготвување: Измијте и исечкајте ги состојките. На тиквата отстранете и ја кората, а од стеблото на кељот отстранете ги листовите. Зеленчукот варете го на тивок оган, во покриено тенџере, некаде околу 20 минути. Кога ќе омекнат сите состојки, иситнете ги со виљушка или миксер притоа додавајќи од водата од готвењето, доколку сакате кашичката да биде поретка. На крајот во оброкот капнете неколку капки маслиново масло и вашето бебенце може да ужива во вкусот.
