Според неодамнешната студија на група шкотски истражувачи се покажало дека медитеранската исхрана би можела да го забави процесот на стареење на мозокот. Со низа претходни истражувања се потврдило дека овој начин на исхрана е добар затоа што изобилува со овошје, зеленчук, интегрални житарки, мешунки, јаткасти плодови, морска риба и маслиново масло, така помагајќи во процесот на регулирање на телесната тежина и превенцијата од срцев удар. Но шкотските научници утврдиле дека овој начин на исхрана поволно влијае и на мозочните функции, како и дека може да го забави процесот на слабеење на памтењето и забавувањето на психомоторните функции кои се јавуваат како резултат на староста.
Исто така, медитеранската исхрана помага и во превенцијата од остеопороза и го намалува ризикот од фрактура на колк за 20 проценти кај постарите жени. Се покажало и дека поволно влијае на расположението и го намалува ризикот од развој на депресија.
Според наодите, пак, на група шпански истражувачи, овој начин на исхрана ги намалува и шансите за појава на рак на дојка. Истражувањето кое го покажало ова траело 5 години и утврдено било дека жените кои се придржувале (а биле дел од проектот) до овој начин на исхрана, имале 68 насто помал ризик од појава на рак на дојка во споредба со жените кои за време на студијата се држеле до режим сиромашен со масти.
