Гестацискиот дијабетес се јавува кај 3-7 % од бремените жени, а инциденцата е очекувано поголема кај трудниците со вишок на килограми.
Со оглед на тоа дека високото ниво на гликоза во крвта за време на бременоста му пречи на развојот на фетусот и може да биде закана за неговото здравје, во многу земји рутински се спроведува OGTT (орален гликоза толеранс тест) помеѓу 24 и 28 недела, односно во почетокот на третиот триместар од бременоста.
Имено, гестацискиот дијабетес обично не се појавува пред втората половина од бременоста. Некои жени се изложени на поголем ризик да развијат гестациски дијабетес од другите. Ризикот е поголем кај жени со прекумерна тежина, кај жени кои во семејството имаат историја на дијабетес тип II, кои се постари од 35 години и оние кои во претходните бремености родиле дете потешко од 5 кг. Жените со еден или повеќе од наведените фактори на ризик ќе бидат тестирани на гестациски дијабетес и пред 24 недела од бременоста.
Инсулинската резистенција игра клучна улога во развојот на гестациски дијабетес. Кај жени со инсулинска резистенција нормалните физиолошки промени кои се јавуваат во текот на бременоста водат до зголемено ниво на гликоза во крвта
Високото ниво на гликоза во крвта на мајката ги зголемува резервите на масно ткиво на фетусот и го попречува нормалниот развој. Нивото на гликоза во крвта се враќа во нормални рамки по породувањето во повеќето случаи. Сепак, истражувањата покажале дека речиси половина од бремените жени со гестациски дијабетес развиваат тип II дијабетес во текот на следните пет години.
Зголемено ниво на шеќер во крвта може да доведе до отежнато или предвремено породување, нарушување во развојот на плодот, вродени аномалии, респираторен дистрес
Децата на мајките со гестациски дијабетес имаат поголема родилна тежина (над 4 100 грама) од другите деца и имаат зголемен ризик од неонатална хипогликемија, но и склоност кон дебелина и дијабетес тип 2, подоцна во животот.
Во голем број случаи, гестацискиот дијабетес може да се држи под контрола со правилна исхрана и физичка активност.
Најдобрите стратегии за превенција на гестациски дијабетес се одржување на соодветна телесна тежина (пред и за време на бременоста), редовна физичка активност и правилна исхрана. Исто така, постигнувањето и одржувањето на посакуваната телесна тежина по бременоста го намалува ризикот од развој на дијабетес тип II подоцна во животот.
