Прекумерното внесување сол во организмот може да предизвика проблеми со срцето и бубрезите, бидејќи солта ги задржува течностите во органзимот. Освен тоа, солта може да предизвика и други здравствени проблеми, затоа обрнете внимание на знаците со кои телото ве предупредува дека користите премногу сол.
Постојат седум причини за кои телото ќе ви сигнализира дека премногу го “солите“.
Чувство на надуеност и отоци
Кога консумирате поголема количина на сол, одредени делови од телото ќе отечат поради задржувањето на течности. Отоците особено се гледаат на лицето во делот околу очите, а отекуваат и прстите на рацете и деловите околу зглобовите.
Се чувствувате жедни
Премногу сол предизвикува дехидратација. Како последица на тоа ќе забележите дека почесто внесувате течности, особено за време на физичка активност или тренинг. Кај активните вежбачи околу усните може да се направи дури и тенок солен слој за време на тренингот. Тоа е знак дека телото се обидува да го исфрли вишокот сол од организмот.
Често мокрење
Премногу сол предизвикува често одење во тоалет, а урината е поматна и со потемна боја. Иако можеби тоа не ви изгледа како сериозен проблем, со мокрењето се губи калциум. Ако во крвта нема доволно калциум, телото ќе го црпи од коските. Заради тоа, лицата кои јадат повеќе сол, имаат поголем ризик да заболат од остеопороза.
Желба за нездрава храна
Прекумерното внесување сол може да доведе до губење на желбата за здрава храна. Лицата кои внесуваат премногу сол често не го сакаат вкусот на здрава и незачинета храна. Затоа по некое време почнуваат да ја солат и храната која веќе е посолена (на пример: колбаси, салами, купечки супи…)
Грчеви во мускулите
Кај лицата кои вежбаат и внесуваат многу сол, често им се јавуваат грчеви во мускулите. Натриумот и калциумот се одговори за контракција на мускулите, а калиумот помага во нивно опуштање. Доколку се поремети балансот на натриум и калиум во организмот, почесто ќе чувствувате болка во мускулите.
Замор
Заморот не е последица на претерана консумација на солена храна, но дехидратацијата предизвикува замор. Тоа особено негативно влијане на оние кои редовно вежбаат.
Проблеми со срцето и бубрезите
Ова е нешто помалку видлив проблем кој се јавува ако долгорочно консумирате премногу сол. Бубрезите не може одеднаш да филтрираат толкава количина на сол, па во телото се задржува вода за да ја разблажи насобраната сол. Тоа предизвикува зголемени течности околу клетките и зголемување на волуменот на крвта, поради што срцето мора да работи забрзано, за да испумпа крв и на тој начин да создаде притисок во крвните садови. Со текот на времето тоа предизвикува оштетување на срцето, крвните садови и бубрезите, што може да доведе до покачен крвен притисок или срцев удар.
Препорачана дневна доза на сол е 2 400 милиграми, односно една лажичка сол. Водете сметка за тоа дека најмногу сол во организот внесувате преку процесуирана храна, затоа исхраната со што повеќе свежи намирници е најдобар начин да внесете помалку сол во телото.
