Се роди првото бебе од трансплантирана матка во САД! Првото раѓање како резултат на трансплантација на матка се случи во Тексас, означувајќи пресвртница за американската медицина.
Жена која била родена без матка донесе на свет здраво бебе во Медицинскиот центар на Универзитетот Бејлор во Далас. Полот на бебето е се уште непознат, исто како и името на мајката. Раѓањето на бебето доаѓа една година откако Медицинскиот центар на Универзитетот Бејлор објави дека извршиле четири трансплантации на матка, но три од нив морале да бидат отстранети поради слаб проток на крв.
Портпаролот на болницата, Крег Чивале, во петокот потврди дека породувањето се случило, но рече дека нема други детали. Болницата не ја идентификуваше жената, почитувајќи ја нејзината приватност. И додека не се знае речиси ништо за новопечената мајка која се породила со царски рез, јавноста го дозна името на донаторката на матката, 36-годишна медицинска сестра, која е мајка на две деца (4 и 6 години) и која живее во близина на болницата во Далас.
„Имам членови на семејството кои се бореа многу за да добијат бебиња и тоа не е фер“, изјави Тејлор Силер за магазинот „Тајм“. „Јас само мислам дека ако можеме да им ја дадеме на повеќе луѓе таа опција, тоа би било неверојатна работа.“
Докторот од Шведска, Матс Бранстром, е прв во светот кој успеа да донесе на свет бебе како резултат на трансплантација на матката. Само во минатата година тој донел на свет пет бебиња од мајки со донирани матки.
