Преминавме на летно сметање на времето, деновите се подолги и мамат на се повеќе активности во природа, но наместо да се чувствуваме полни со енергија и да уживаме, уморни сме, поспани, безволни, раздразливи, деконцентрирани и исцрпени. Многумина ќе побараат и лекарска помош. Но, кај повеќето, што го потврдуваат и истражувањата, станува збор за синдром на пролетен замор кој не е болест, туку нормален физиолошки процес кој со поголем или помал интензитет се јавува кај голем број луѓе.
Стручњаците тврдат дека пролетниот замор почесто се јавува кај лица пречувствителни на временските промени, нагло растење на температурите, промена на притисокот на воздухот и поголема изложеност на сонце, кај алергичните лица или пак кај оние кај кои поради едноличната зимска исхрана е исцрпена залихата на витамин Ц во организмот, а со тоа и е намалена искористеноста на кислородот во клетките и е ослабен имунитетот.
На овој синдром повеќе се жалат мажите. Но, со промена на прехранбените навики и поголемо консумирање на намирници кои содржат големи количини на витамин Ц, железо, минерали, внесувањето на доволно течности, како и поголема физичка активност како пешачење, трчање, ролање, возење велосипед и престој на свеж воздух, и сами може да си помогнеме.
Пролетниот замор полесно се совладува и со внес на витамин Б кој позитивно делува на расположението, а се содржи во месото, рибата, интегралните житарки, мешунките…
Потребниот магнезиум се наоѓа во гравот, грашокот, сојата, јаткастите плодови или чоколадо со висок процент на какао. И исхрана која се темели на сложени, здрави јаглехидрати со низок гликемиски индекс го “брка“ пролетниот замор и ја враќа енергијата.
