Дури и мало количество црвено месо и месни преработки како еден лист сланина дневно, можат да го зголемат ризикот од појава на карцином на дебелото црево, тврди најновото истражување направено на Универзитетот Оксфорд. Студијата финансирана од британската организација за истражувње карциноми ги прави побројни доказите за штетноста на црвеното месо, со слични тврдења е и Светската здравствена организација.
Колку навистина е голем ризикот и кое е количеството од овој вид храна што е потенцијално опасно?
Истражувачите анализирале податоци од речиси половина милион луѓе, од кои во период од шест години дури 2 609 заболеле од рак на дебелото црево, пренесува Би-би-си. Врз основа на набљудуваните податоци, научниците заклучиле дека со консумирање на три листа сланина дневно може да се зголеми ризикот од рак за дури 20 отсто. Освен тоа на секои 10 000 луѓе кои дневно внесувале по 21 грам црвено месо (отприлика еден поголем лист сланина) или месни преработки, 40 од нив заболеле од рак на дебелото црево. Во случајот со оние кои дневно јаделе по 76 грама од истото место, тој број пораснал на 48 луѓе.
Истражувањето, пак, не дало дефинитивен одговор на прашањето колку црвено месо е премногу. Според овие податоци, дури 5 400 од 41 804 случаи на заболени од рак на дебелото црево можеле да се спречат ако заболените не консумирале месни преработки.
Низа организации кои се бават со јавно здравје во Велика Британија, но и други западни држави, со години советуваат дека треба да се јадат помали количества црвено месо и месни преработки. Британското министерство за здравје им препорачува на луѓето кои јадат по 90 грама такво месо на ден количеството да го намалат на 70. Од друга страна, има тврдења дека црвеното месо има и добри страни, како што е високо количество на железо и протеини што треба да се земат предвид кога се проценува потенцијалниот ризик. Месните преработки како сланината, колбасите, виршлите, саламите обработени се така да им се продолжи рокот на траење и да им се поправи вкусот што се постигнува со чадење, додавање соли и конзерванси. Стручњаците меѓутоа и понатаму не се сосема сигурни што точно во црвеното месо го зголемува ризикот од заболување од рак.
