Сите знаеме колку е корисно да се пие по еден и пол литар вода дневно, но колкумина од нас всушност го следат ова правило? Жедтта може да биде предизвикана токму од несоодветното внесување на вода во текот на денот. Солната храна (особено во поголеми количини), исто така, може да ја потхрани и испровоцира потребата за вода. Последно, но не и најмалку важно – и напорниот тренинг може да биде причина за жед.
Постојаната жед сепак е начин телото да ни сигнализира одреден здравствен проблем. Ако пиете еден литар вода дневно, но сепак чувствувате дека устата ви е постојано сува најдобро е да се консултирате со лекар.
Дијабетес
Дијабетесот може да го зголеми ризикот од дехидрација, особено ако се уште не сте свесни за овој здравствен проблем. Кога шеќерот во крвта е превисок, телото ги поттикнува бубрезите да произведуваат повеќе урина за да се отстрани вишокот гликоза. Честото мокрење е уште еден симптом кој може да биде одговорен за жедтта. Ако сте постојано жедни, често уринирате, губите на телесна тежина, уморни сте и раздразливи, треба да направите тест за дијабетес.
Менструален циклус
За време на месечниот циклус може да се чувствувате постојано жедни. Не грижете се – тоа е сосема нормално. Нивото на естроген и прогестерон во телото во текот на овој период може да влијае на обемот на течности. Ако на тоа се додаде и дополнителното губење на крв (што кај некои жени е особено изразено) резултатот е дополнително зголемување на жедтта.
Сувост во устата
Сувоста во устата или позната и како ксеростомија е состојба при којашто усната шуплина е посува од нормалното. Се забележува намалено лачење на плунка или промена на нејзиниот состав. Сувоста во устата може да биде несакан ефект на земање на одредени лекови на рецепт, антиалергени лекови и лекови за вртоглавица или гадење при патување. Некои болести, исто така, може да бидат причина за појава на сува уста, па во случај на сомнеж, најдобро посоветувајте се со лекар.
Анемија
При анемија телото ги губи црвените крвни клетки побрзо отколку што може тие да се заменат. Оваа состојба може да доведе до незаситна жед.
Низок крвен притисок
Хроничниот стрес влијае негативно на надбубрежните жлезди, што може да доведе до низок крвен притисок. Нискиот крвен притисок се карактеризира со вртоглавица, депресија, анксиозност и голема жед. Жедтта е начин телото да обезбеди повеќе вода во крвта за да го зголеми крвниот притисок. Единствено долгорочно решение за овој проблем е намалување на стресот.
Диети
Храната која има диуретичен ефект (аспарагус, цвекло, лимон, диња, ѓумбир и магдонос) може да предизвикаат жед поради почестото мокрење.
