Кога е во прашање настинка, постојат два типа на луѓе. Оние кои поради два дена кашлица одат на лекар и оние кои ја игнорираат и велат дека им е нешто со грлото. Д-р Шана Левин, семеен лекар од Њујорк, вели дека многумина мислат дека “чудната“ кашлица е само настинка и дека не се работи за нешто посериозно и не сакаат да одат на лекар. Едно истражување од 2015. Покажало дека дури 43% од исптаниците сами се лекуваат и сами си поставуваат дијагноза, наместо да посетат лекар. Затоа ви укажуваме на неколку симптоми поради кои сепак би требало да посетите стручно медицинско лице.
ПОМИНАЛЕ ПОВЕЌЕ ОД ТРИ НЕДЕЛИ
Иако три недели делуваат како многу време, сосема е нормално настинката да потрае и до 21 ден. Но, ако кашлицата трае подолго од три седмици, тоа може да биде загрижувачко, вели докторката. Долготрајните симптоми може да бидат знак на астма, воспаление на белите дробови или некоја друга белодробна болест. Во тој период од три недели, вашите симптоми треба да се стабилизираат, а потоа и целосно да исчезнат.
СИМПТОМИ КОИ СЕ ПОВРАТИЛЕ И СЕ ВЛОШИЛЕ
Ако сте имале симптоми на грип, па ви било подобро, а потоа симптомите се вратиле со уште повисока температура и кашлица, време е за на лекар. Д-р Левин вели дека можеби во прашање е “секундарна инфекција“, а тоа може да биде се, од бронхитис до воспаление на белите дробови.
ЧУДНА БОЈА НА ИСЕДОКОТ ОД НОСОТ
Откако сте го издувале носот, сте забележале дека исцедокот е со чудна боја. Ова е збак дека во телото се случува нешто необично и дека најверојатно е во прашање некоја инфекција, и треба веднаш да отидете на лекар.
ЧЕШАЊЕ И СОЛЗЕЊЕ НА ОЧИТЕ
Ако очите постојано ви солзат, постои шанса да имате алергија, а не само обична настинка. Понекогаш е тешко да се воочи разликата. Останатите симптоми на алергија се осип, отекување на јазикот, вртоглавица, грчеви во желудникот…
ТЕШКО ДИШЕЊЕ
Кашлицата е чест симптом на настинка, но ако тешко дишете, и тоа е проследено со стегање во градите, може да се работи за напад на астма, смета докторката. Астмата се карактеризира и со зголемено таложење на слуз во бронхиите која дополнително го спречува нормалното дишење. Недостатокот на воздух, свирење во градите се црвен аларм за посета на лекар.
БОЛКА И СИЛЕН ПРИТИСОК
Исто така, треба да бидете внимателни и ако имате болки или притисок во одреден дел од телото. Ако забележите дека лошо слушате, чувствувате болка во увото или од него се јавува иседок, тоа се причини да посетите лекар.
