Освен замор, нервоза, температура или болно грло, постои уште еден симптом кој може да открие дека организмот се бори против нешто, а тоа се отечените лимфни јазли. Тој цел систем е важен за имуниот систем, а лимфните јазли ги потхрануваат белите крвна зрнца кои ги напаѓаат и уништуваат заканите, како бактерии и вируси. Кога ќе се појави закана, таа поминува низ лимфните јазли каде се филтрира и уништува од страна на белите крвни зрнца.
Лимфните јазли се мали жлезди со големина на грав сместени секаде низ телото. Најмногу ги има под пазувите, вратот, градниот кош, абдоменот и препоните. За лимфниот јазол да се за смета зголемен, треба да биде поголем од 1-1,5 цм на вратот или во пазувите, односно 1,5-2 цм во препоните.
Секако треба да се напомене и дека одредена група на лимфни јазли не означува еднакви тегоби. Така, жлездите зад увото и под вилицата обично отекуваат во случај на воспаление на грлото или настинка. Лимфните јазли во пазувите се воспалуваат во случај на инфекција или повреда на раката. Ретко кога може да упатуваат на рак на дојка. Бутните лимфни јазли може да отечат поради инфекција во нозете, препоните или гениталиите, а понекогаш може да упатуваат на рак на тестиси. Кога се работи за лимфните јазли под клучната коска, т.н. супраклавикуларни лимфни јазли, тие се воспалуваат во случај на инфекции на подрачјето на вратот, белите дробови или абдоменот.
Лимфните јазли најчесто отекуваат како последица на воспаление, и како такви не се особено опасни. Поголеми стануваат најчесто на местото во близина на воспалението. Често сами се повлекуваат кога инфекцијата ќе престане.
“Понекогаш лимфните јазли ја губат својата заштитна функција и стануваат расадник за бактерии: на пример, крајниците, кои исто така се лимфни јазли служат како заштита на влезот во грлото: понекогаш, особено по чести воспаленија на грлото, во тие лимфни јазли се населуваат бактерии кои постојано предизвикуваат нови воспаленија на тие лимфни јазли и грлото. Во тој слуачј, тој лимфен јазол ја изгубил својата функција, па треба да се отстрани. Исто е и со воспалението на слепото црево: кога ќе настане гнојно воспаление кое организмот сам не може да го реши, бидејќи агресивните елементи станале посилни од одбранбените, тогаш слепото црево треба да се отстрани“, појаснува д-р Марино Кварантан, интернист.
КОГА ДА СЕ ПОБАРА ЛЕКАРСКА ПОМОШ?
Ако состојбата не се повлекува, местото е болно или проблемот се зголемува, посетете лекар.
Во некои случаи, отечените лимфни јазли може да бидат последица од многу поопасни состојби, па е важно да се посети лекар.
Д-р Никхил Бајани, стручњак за инфективни болести наведува дека причините за отечени лимфни јазли можат да бидат различни, како настинки или грип, мононуклеоза, сексуално преносливи болести, инфекции на кожата, артритис, па дури и некои форми на карцином, а секоја од нив бара преглед кај лекар.
Отечените лимфни јазли може да бидат добар знак дека органзимот се бори против силна инфекција. Но, мора да следите дали се зголемуваат, дали имаат некои други симптоми како температура, замор или силно потење навечер и дали се болни на допир. И во тој случај потребен е преглед од лекар.
