Додека во некои земји се уште не е завршен првиот, светските научници се подготвуваат за можниот втор бран на коронавирусот, кој би можел да се појави наесен.
Сите искуства стекнати во борбата против епидемијата со коронавирусот, ќе се обидат да се применат во можниот втор бран, а целта е избегнување на целосно затворање. Научниците тврдат дека покрај тоа, освен бројот Р, ќе биде клучен и бројот К, кој ја покажува брзината на ширење на вирусот во одделни групи кои се нарекуваат суперширители на КОВИД-19.
Додека со бројот Р се изразува колку луѓе може да зарази едно заболено лице, бројот К покажува колку брзо се шири болеста во одредени кластерти, односно за време на случувања на кои се собираат многу луѓе.
БРОЈ К
“Кластер значи ширење на болеста во помали групи, а бројот К зборува за тоа колку лица се одговорни за одреден процент на заразување“, објаснува епидемиологот д-р Бранко Колариќ од Наставниот завод за јавно здравје во Загреб.
Тој додава дека КОВИД-19 не се шири еднолично. Во некои услови, на пример, кога има многу луѓе на исто место кои гласно зборуваат, викаат или пеат, а истовремено е и студено, коронавирусот побрзо ќе се шири.
Во Школата за хигиена и тропска медицина во Лондон, велат дека едно од 10 заразени лица е суперширител, односно многу лесно го шири коронавирусот.
Експертите оттаму нагласуваат дека околу 80 проценти од сите случаи на КОВИД-19 ги предизвикуваат само 10 проценти од пациентите. Кога тие ќе се најдат во некоја голема група на некое спортско случување или концерт, сигурно е дека и многумина ќе се заразат. Опасноста е поголема во затворен простор, отколку на отворено, и за тоа до 19 пати.
Поради тоа, научниците сметаат дека во вториот бран исклучително важно ќе биде токму следењето ан тие мегаслучувања. Препораката на стручњаците е да се избегнуваат гужви и масовни собирања се додека не се пронајде вакцина и не се стекне колективен имунитете. Според компјутерските симулации, најдобро е контактите да се ограничат на оние секојдневни, од типот на дом, работа, градинка…
