Европската агенција за безбедност на храна значајно ги намали препорачаните ограничувања кога станува збор за количината на диоксини и со нив поврзаните токсини во храната.
Диоксините се хемикалии кои се поврзуваат со проблемите во репродуктивното здравје, имуниот систем, со нивото на хормоните и забната глеѓ.
Диоксините и токсините налик на диоксините, како полихлорираните бифенили (PBC), главно се нуспроизводи на индустриските активности и и може да се насоберат во прехранбениот синџир, особено во рибата, сирењето, јајцата и во месните преработки.
Новата препорака на Европската агенција на неделниот внес на диоксини е за седум пати помала!
Новите податоци и техниките за пресметка колку диоксините остануваат во организмот, ги увериле во Европската агенција дека максималната дозволена количина на неделно ниво е 2 пикограми по килограм телесна маса, што е за седум пати помалку од претходниот лимит, поставен во 2001 година.
Ревизијата на Агенцијата за ризикот од диоксините покажала дека просечната изложеност на луѓето од сите возрасти е приближно за пет пати повисока од препорачаната граница. „Тоа предизвикува голема загриженост кога станува збор за здравјето„, изјави Рон Хогенбум, шеф на работната група при Европската агенција за храна.
Според Светската здравствена организација, еден од најтоксичните диоксини е тетрахлородибензодиоксин (TCDD). Изложеноста на TCDD се поврзува со слабеењето на имуниот систем, слабиот развој на нервниот систем, ендокринолошкиот систем и на репродуктивните функции.
Тие соединенија се спореден продукт во разни индустриски процеси. Се сметаат за многу токсични, канцерогени соединенија и тешко разградливи органски загадувачи.
Кога станува збор за храната од животинско потекло, диоксините се наоѓаат во месото, млекото и млечните прозводи, рибите, школките. Највисоко ниво на диоксини биле пронајдени во масното ткиво на животните. Дури 96% од изложеноста на човекот на диоксини доаѓа од храна преку животинските масти, полномасните млечни производи, масните риби (сардини, пастрмка, туна, лосос, харинга).
Диоксините се поврзани и со лошиот квалитет на забната глеѓ, како и со зголеменото ниво на хормони кои ја стимулираат работата на штитната жлезда.
Според новите препораки на Агенцијата, Европската комисија ги повикала земјите членки да превземат мерки за заштита на потрошувачите.
