Веќе знаете дека намалувањето на килограмите во секој поглед е добро за вас, но дали знаете колку точно е добро!? Од памтењето до дишењето, слабеењето има позитивни ефекти на целото тело, односно на голем број органи!
Бели дробови
Губењето на 5 до 10 отсто од телесната тежина го намалува губењето на здивот и ја подобрува функцијата на белите дробови.
„Ова може многу да го смени вашиот живот. Можеби звучи смешно да се качите по скали без да го загубите здивот, но тоа навистина го менува животот“, истакнала нутриционистката Керолин Палистер за Мирор.
Црн дроб
Губењето на килограмите помага во спречувањето на наталожувањето маснотија околу црниот дроб.
„Ако не се лекува, масниот црн дроб може да резултира со рак на црниот дроб или откажување“, објаснува Ванеса Хебдич од Центарот за болести на црниот дроб. Со слабеење во голема мера штетата може да се поправи, а црниот дроб да се врати во нормала.
Грб
Прекумерната тежина предизвикува болки во грбот, но слабеењето и движењето тоа можат да го спречат, а, исто така, и да го забрзаат опоравувањето.
„Со слабеењето се отстранува вишокот килограми кои ги оптоваруваат мускулите и ’рбетниот столб“, вели физијатарот Тим Алардајс.
Црева
Дебелината го зголемува ризикот од рак на цревата, па така со одржувањето на здрава телесна тежина се штитите од ова тешко заболување. Исхраната богата со овошје, зеленчук и интегрални житарки, исто така, го намалува ризикот.
Мозок
Не само што одржувањето на здравата телесна тежина ќе му помогне на вашиот мозок добро да функционира подоцна во животот, туку може и да го подобри. Паметењето и менталните процеси генерално стануваат подобри откако ќе го загубите вишокот килограми.
Гради
„Ако сте дебели, губењето на пет отсто телесна тежина или повеќе го намалува ризикот од рак на дојката за 25-40 отсто“, тврди доктор Мишел Харвије, стручњак за превенција од овој вид рак.
Колена
„Ако индексот на телесна маса ви е 30 или повеќе, поголеми се шансите дека ќе развиете остеоартритис на колено. Но секој половина килограм кој ќе го загубите може за четири пати да ја намали тежината на колената“, објаснува ревматологот Филип Конахен. И најмалото губење на тежината може да значи голема разлика во напрегањето на зглобовите.
Стапала
„Вишокот килограми влијае и на начинот на кој се движите. Стапалата се широко поставени, а прстите кон надвор. Тоа го намалува лакот на стапалата, заради што тие се нестабилни, а тоа води кон проблеми како што се болки во стапалата, колената, колковите и долниот дел од грбот. Слабеењето може да ја подобри состојбата за само 12 недели“, вели доктор Френ Кембел.
Срце
Губењето на 5 до 10 отсто телесна тежина е поврзано со намалувањето на големината на срцето, како и со густината на артериите, што се добри вести за превенција од срцев удар, покажало истражувањето направено од страна на група лекари од Вашингтон.
