Паничен напад се доживува како изненадна навала на различни физички симптоми: немање на здив, мускулни грчеви и мачнина. Се јавуваат проследени со интензивна вознемиреност. Но, ако во тој момент лицето го прегледа лекар, испитувањата ќе покажат дека со неговото здравје се е во ред. Нападите на паника обично се проследени со изразена фрустрација и чувство на безнадежност заради недоволните информации или немањето на јасна причина за тоа што се случува.
Лекарите велат дека прифаќањето на паничното растројство значи намалување на интензитетот на последиците што лицето ги доживува.
Иако, медицинската анализа ќе покаже дека здравјето на пациентот е во добра состојба, прегледот е важен од други причини. Лицето на тој начин ќе се увери дека навистина станува збор за панични напади, а не за некоја друга болест. Регуларниот здравствен наод може да му помогне, пациентот да го отфрли ирационалниот страв од смрт и умирање, кои често се јавуваат при паничниот напад. Стручното лице истовремено ќе може да направи разлика помеѓу повремени панични напади и панично растројство кое обично подразбира психотерапевтски и/или фармаколошки третман. Овие епизоди се делумно симптом на други здравствени состојби, како дисфункција на тироидната жлезда или лактозна реакција.
Информираноста за симптомите е клучна, бидејќи на тој начин, лицето ќе може да направи разлика меѓу паничен и срцев напад, алергиска реакција или друг сериозен проблем. Препознавањето на паничен напад дава можност да се донесе вистинска одлука. Конечната дијагноза за тоа дали едно лице страда од панични напади ја носи лекар специјалист во таа област.
Ова се симптоми карактеристични за панична епизода:
- Неправилно срцебиење;
- Вртоглавица и лошење;
- Недостаток на здив;
- Гушење и мачнина;
- Тремор (тресење) и потење;
- Замор и мускулна слабост;
- Болка во градите или зголемени киселини;
- Мускулни грчеви;
- Нагли промени во телесната температура (топло-ладно);
- Трпки во рацете и/или нозете;
- Страв дека полудувате;
- Страв дека умирате или сте сериозно болни.
Паничниот напад најчесто е физичка реакција на страв (било тој страв да е свесен или несвесен) и истиот е проследен со несекојдневни физички симптоми како реакција на овој страв.
Ако чувствувате дека ќе доживеете паничен напад, може да воспоставите поголема контрола преку примена на едноставни техники на дишење и релаксација. Притоа, не очекувајте да ја совладате техниката додека го доживувате нападот, напротив, пожелно е нивно вежбање додека сте смирени и во нормална психичка состојба. Вежбањето на овие техники два пати на ден по 10 минути може да направи значителна промена во зачестеноста на нападите и да ја намали нивната јачина.
