Кога ќе поминат топлите денови, сите знаеме што веројатно следи – затнат нос. Оваа година, на сите нам оваа позната појава, можеби може да биде и причина за загриженост, со оглед на пандемијата со КОВИД-19.
Факт е дека течењето на нос и затнатиот нос се наведени како симптоми на новиот коронавирус, според Центарот за контрола и превенција на болести на САД, но истовремено не се сметаат за најчести симптоми, наведува д-р Неха Вајас.
Колку треба да бидеме загрижени ако носот ни тече, ако е затнат и ако киваме? Еве што треба да знаете.
- КОЛКУ ЧЕСТО СЕ ЈАВУВА КАКО СИМПТОМ НА КОВИД-19?
Засега нема податоци колку заразени лица го имаат и овој симптом, но Светската здравствена организација вели дека постојат. На самиот почеток на пандемијата, СЗО објави резултати кои тврдат дека 4,8% од пациентите во Кина го пријавиле и овој симптом. Бројката е многу помала од симптомите како зголемена температура (87,9%), сува кашлица (67,7%) и замор (38,1%).
- КАКО ДА ЗНАЕТЕ ДЕКА КАЈ ВАС СЕ РАБОТИ ЗА СИМПТОМ НА КОВИД-19?
Како и многу други симптоми на коронавирусот, затнатиот нос не е специфичен симптом, што значи дека може да се поврзе со бројни други болести. Тоа е особено важно да се знае во време кога ни се закануваат грип и алергии, но и обична настинка.
Дали станува збор за КОВИД-19 може да дознаете ако се тестирате – а таа одлука ќе зависи и од други симптоми, околности и мислење на лекарот. Значи, важно е да се контактира матичниот лекар, освен ако имате и некои потешки симптоми кои бараат итен преглед кај лекар.
Д-р Вајас наведува дека ако и дојде пациент со наведниот симптом, прво ќе провери дали пациентот има и други симптоми на КОВИД-19 и општата здравствена состојба.
“Важно е да не се донесуваат заклучоци без проверка, па така секој лекар ќе праша дали постојат и симптоми на алергија и дали ги имате секоја година истите проблеми кога ќе дојде есен“, додава таа.
Покрај тоа и вашите животни навики играат голема улога. Ако ги игнорирате препораките за дистанцирање, не носите маски или не миете раце, тест за коронавирус би морало да биде следен чекор, заклучува д-р Вајас. Сепак, ако сте од оние кои ги следат препораките, вашиот матичен лекар веројатно нема веднаш да ве советува да се тестирате на коронавирус.
