Од почетокот на пандемијата, луѓето прават се за да се заштитат од коронавирусот. Од миење на рацете до одржување на дистанца на сите јавни места, бескрајна е листата на работи до кои се придржуваме за да се заштитиме. Благите симптоми на омикрон многумина ги натераа да размислат дали можеби треба намерно да се заразат.
Зошто луѓето сакаат намерно да се заразат?
Концептот на намерно заразување со омикрон потекнува од идејата дека КОВИД-19 е неизбежен. Освен тоа, се верува дека инфекцијата со висуот може да помогне во развојот на долгорочен имунитет. Кога телото само се бори со инфекцијата, станува подобро подготвено да се бори со други варијанти на истиот вирус во иднина. Истражувањата сугерираат вакцинирањето плус инфекцијата нудат силна заштита против варијантите на коронавирусот. Ако се базираме на таа логика, многумина претпоставуваат дека е подобро да се заразиме за да добиеме уште еден слој заштита.
Зошто е тоа лоша идеја?
Иако многу лица сметаат дека тоа е практична идеја, стручњаците во областа на медицината тоа никако не го препорачуваат. Д-р Ракеш Пандит вели дека намерното заразување со коронавирус во овој период би било глупава идеја. Тој објаснува дека тоа не е практично решение, бидејќи со ПЦР тестот не може да се открие дали се работи за омикрон или за делта варијантата. Значи, никој не може да предвиди со која варијанта ќе се зарази. Може да биде омикрон или делта, а сеедно подоцна може да доведе до тешки симптоми.
“И понатаму има 10 до 15 отсто случаеви на заразени со делта и невозможно е да се знае дали поединецот ќе се зарази со делта или со омикрон“, вели д-р Пандит.
Исто така, сериозноста на инфекцијата зависи од тоа колку вирус е влезено во телото. “Инфекцијата со варијантите на КОВИД-19 не е како давање на одредени дози некому, претпоставувајќи дека само мала количина од вирусот ќе стигне во вашето тело и дека ќе развиете имунитет. Тоа во целост зависи од тоа колку е заразно лицето кое го шири вирусот на други. Ако тоа лице во себе носи голема количина вирус, поголема е шансата да имате потешки симптоми“, објаснува докторот.
“Благ“ е потценет термин за омикрон
Повеќе студии сугерираат дека омикрон доведува до благи симптоми, но терминот благ е потценет збор во термините за коронавирусот. Дури и оваа блага варијанта ќе го поремети вашето дневно функционирање најмалку 10 дена. Ќе мора да се соочите со различни симптоми како треска, кашлица, отежнато дишење, болки во мускулите, главоболка, губење на мирис или вкус, мачнини и повраќање. Згораа на се, секогаш постои ризик од развој на долгорочни симптоми.
Д-р Вилај Дута вели дека многу луѓе не се свесни за сериозноста на заразата со омикрон, додека не се соочат со симптомите на постковид.
Може да заразите и други
Заразеното лице почнува да го шири вирусот уште пред да ги види симптомите. Ова значи дека не само што себеси ќе се ставите во опасност, туку ќе го ширите вирусот и на останатите.
Д-р Пандит предупредува дека е важно да се знае дека не постои регулиран начин да се заразиме со вирусот. Затоа е важно да се следат упатствата издадени од владите за заштита од коронавирус. Вирусот ја менува својата структура и доаѓаат нови варијанти кои го избегнуваат нашиот имунитет. Единствениот начин да останете безбедни е да се вакцинирате и да ги следите сите мерки за заштита од инфекција.
