Еден час пливање во базен за време на паузата не е ништо невообичаено за жителите на некои западни земји, но многу шведски работодавци оваа пракса постепено ја воведуваат како задолжителна.
Меѓу нив се и јавното претпријатие за дистрибуција на вода „Калмар Ватен“, но и компанијата на познатиот шведски тенисер Бјорн Борг AB, чиј истоимен моден бренд е многу популарен.
Спортските активности е речиси невозможно да се избегнат, а целта е – дружење на вработените, поголема продуктивност и профитабилност
Резултатите од истражувањето што го спроведе Универзитетот во Стокхолм во 2014 год. покажале дека препотувањето за време на физичка активност која е во склоп на работниот ден – е позитивно и за вработените и за работодавачите.
Вработените се поконцентрирани, фокусирани на работата и во подобра форма. Работодавачот, исто така, има корист од тоа – задолжителните спортски активности за време на паузите за ручек биле клучни за намалување на работните отсуства и боледувања. Дури имало и 22 отсто помалку отсуства од работа, што не е малку бидејќи процентот на боледувања во Шведска е двојно поголем од европскиот просек.
„Веруваме дека добрата форма, среќа и сила се постигнуваат со постојано движење на отворено“, изјави Карл Сидерстроем, научник од универзитетот во Стокхолм, истакнувајќи дека тој не се залага за спортска активност по секоја цена, бидејќи спортот и не значи дека сте нужно подобра личност.
Како и да е, Швеѓаните се гордеат со тоа што се најспортски народ на Стариот континент. Според податоците на Евробарометар од 2014 година, 70 проценти од нив се занимаваат со спортски активности на неделна основа, а 51 процент два до три пати неделно. Физички најнеактивни Европејци, пак, се Бугарите. Само 22 отсто од нив вежбаат еднаш неделно.
Од крајот на осумдесеттите години, поголемиот дел од шведските компании субвенционираат спортски активности на вработените во просек од 500 евра годишно, кои се ослободени од плаќање данок.
