За разлика од запекот, дијарејата, стомачниот вирус или труењето со расипана храна, воспалението на слепо црево многу поретко се јавува кај луѓето. Според истражувањата само пет отсто од пациентите во текот на животот се соочуваат со овој проблем. Слепото црево, инаку може да создаде големи здравствени проблеми, а во некои екстремни ситуации, ако знаците и симптомите не се следат навреме, може да перфорира односно да пукне и да дојде до излевање и сепса. Може да се јави кај секој човек независно од полот и возраста, но сепак почесто се јавува кај млади луѓе, деца и адолесценти, а многу поретко кај постари лица или деца до две години.
Првите симптоми наликуваат на обична стомачна болка, односно појава на болки во долниот дел на стомакот, гадење, повраќање, губење апетит, како и чувство на отеченост, надуеност и болка при допир.
Поради тоа многу често првите знаци се игнорирани. Но исклучително е важно да се реагира навреме, зашто може да дојде до поголеми компликации. Доколку се потврди дијагнозата на воспаление на слепото црево, единствен начин на лекување е хируршкиот.
Ова се некои од симптомите кога треба да појдете на лекар:
- Исклучително силни болки во стомакот, обично прво околу папокот или над него. Подоцна болката се чувствува во целиот стомак, најчесто се локализира во долниот десен дел;
- Повраќање и губење на апетитот;
- Температура;
- Не се чувствувате добро, а тоа може да е знак дека инфекцијата доспеала во крвотокот;
Совет: Важно е навреме да се препознаат симптомите и да се реагира, затоа што ако дојде до развој на потешки фази, тогаш и оперативниот зафат е потежок и понеизвесен.
Со воспаление на слепото црево се соочуваат околу 5 отсто од луѓето, но она што треба да се знае е дека ако не се лекува, тоа може да пукне и да доведе до сепса – а сепсата може да биде опасна по животот.
Еве некои предупредувачки знаци кои не треба да се игнорираат, туку треба веднаш да се побара лекарска помош:
Ако стомакот ве боли посилно од вообичаено
Воспалението на слепото црево обично предизвикува силна болка која се протега од папокот до долната десна страна на стомакот. Иако тоа не значи дека е нужно оти слепото црево ќе пукне, неопходно е да направите тестови за да бидете сигурни. Некои пациенти имаат и други видови на непријатност, на пример, болка при одење или при кашлање. Слепото црево може да биде и на раб на пукање или можеби веќе дошло до пукање што е мошне опасно.
Чувствувате мачнина, повраќате и немате апетит
Можеби само се борите со стомачни проблеми, па ги имате овие симптоми. Но се чувствувате навистина непријатно, покрај тоа што имате болки, сепак проверете го слепото црево. Воспалението на слепото црево понекогаш влијае и на други аспекти на дигестивниот тракт, како и нервниот систем што за последица има мачнина и повраќање.
Трчате во тоалет повеќе од вообичаено
Кај некои луѓе слепото црево е поставено пониско во карлицата, така што прилично близу е до бешиката. А кога таа ќе дојде во контакт со воспаленото слепо црево и таа се воспалува и станува чувствителна. Како резултат на ова можно е да имате потреба почесто да одите во тоалет од обично, а самото мокрење е болно и тоа може да укажува уринарна инфекција или во комбинација со другите наведени симптоми може да укаже на воспаление на слепо црево.
Имате треска
Треската е знак дека некаде во вашето тело постои воспаление. Ако постои воспаление, телото реагира со отпушање на неколку хемикалии како би ги поттикнало клетките да се изборат со воспалението. Ако имате болка во стомакот или ако треската се влошува, консултирајте се со лекар.
Не сте присебни
Ако сте збунети и дезориентирани, тоа може да значи дека инфекцијата се влошува. Може да дојде и до сепса, доколку дојде до пукање на слепото црево што може да биде фатално. Кога се шири инфекцијата се троши кислород, кој му е неопходен на мозокот, а како резултат на неговиот недостаток доаѓа до конфузија и состојба на збунетост.
