Речиси во секое семејство има член со срцева болест. Многу често во тек на летниот период луѓето со срцеви заболувања остануваат дома и не уживаат во летниот одмор. Со малку внимание кон нивните специфични потреби и нивниот летен одмор може да помине многу убаво, но пред заминување на која било дестинација, езеро, планина или море, задолжително консултирајте се со вашиот кардиолог.
Кога надворешните температури се високи, телото има потреба да се разлади. Разладувањето на телото настанува со ширење на крвните садови преку механизмот на потење. При тоа срцето забрзано работи, а крвниот притисок се намалува. Затоа треба внимание кај пациентите кои примаат лекови за намалување на крвниот притисок.
Внимание е потребно и кај пациентите со ослабено срце кои примаат лекови за исфрлање на вишокот течности од телото. Дехидратацијата ја зголемува густината на крвта, што е опасно кај пациентите со вештачка валвула, како и кај коронарните болни со антикоагулантна терапија. Оваа опасност важи и за сите пациенти со претходна историја на венска тромбоза или тромбоемболични компликации.
Езерото или морето се најчест избор за летните одмори. Се советува да се избегнува изложување на директни сончеви зраци во најтоплиот дел од денот од 11 часот до 17 часот. Во тек на најтоплиот дел од денот најдобро е да се престојува во климатизирани простории, но не премногу ладни, оптимално околу 22-24 степени. Избегнувајте нагло излегување од многу ладна просторија во надворешни услови на температури кои се над 30 степени. Главата треба да биде заштитена со капа. Кога има голема разлика меѓу надворешната температура и морската или езерската вода, секогаш е потребно внимателно, бавно прилагодување. Да се избегнува напорно и долготрајно пливање, како и долги и напорни активности и спортувања.
Престојот на планина е одличен избор за летен одмор. Се разбира, не на многу голема надморска височина. Секогаш е доволно свежо, па се препорачуваат долги, не многу напорни прошетки на чист воздух. Внимателно одберете ги обувките кои треба да бидат лесни, удобни, но доволно сигурни. И тука секогаш е најдобро да имате капа која ќе ја штити главата. Лекарствата најдобро е да се испијат пред да појдете на прошетка. Секогаш при себе имајте доволно течности и тоа најдобро не премногу засладени.
Летна исхрана
- Јадете лесна храна без многу сол;
- Консумирајте повеќе, но полесни оброци;
- Јадете овошје и зеленчук;
- Пијте оволно течности, најдобро вода;
- Избегнувајте многу засладени напитоци;
- И секако: не ја заборавајте препишаната терапија!
Во услови на директна изложеност на сончеви зраци, дехидратацијата може да доведе до топлотна исцрпеност и топлотен удар, особено кај срцевите болни и треба да бидат препознаени навремено.
Симптоми на топлотна исрцпеност:
- Изразено потење;
- Ладна и леплива кожа;
- Вртоглавица или несвестица;
- Забрзан пулс (срцебиење);
- Плитко и забрзано дишење;
- Повраќање.
Симптоми на топлотен удар:
- Врела кожа, без потење;
- Забрзан пулс;
- Висока телесна температура;
- Конфузност до степен на губиток на свест.
