Социјалните мрежи почесто предизвикуваат депресија кај девојките, отколку кај момците – еве и зошто

Научниците откриле дека депресијата кај девојките е поврзана со количеството на време кое го поминуваат на социјалните мрежи, со што автоматски се поврзува и злоставувањето преку интернет и недостатокот на сон.

„Девојките, особено тинејџерките потешко се носат со некои работи отколку момченцата“, рекла професорката Ивона Кели, додавајќи дека повеќето девојки на возраст од 14 години не се задоволни од својот изглед, па постојано се споредуваат со другите девојки од социјалните мрежи и сето тоа ги депримира.

Истражувањето опфатило 11 000 девојки на 14-годишна возраст, а открило дека тие ги користат социјалните мрежи многу повеќе од момчињата и со самото тоа покажуваат поголеми знаци на депресија која е поврзана со нивната интеракција на Фејсбук, Инстаграм и Ватсап.

„Поврзаноста на депресијата и социјалните мрежи е посилна кај девојките отколку кај момците. Тие поминуваат повеќе време користејќи ги што резултира со депресија“, рекла Кели.

Истражувањето, исто така, покажало дека голем број тинејџери се жртви на интернет насилство, па послабо спијат и покажуваат големи знаци на депресија. Голем број млади луѓе покажале зависност од ’лајкови’ и коментари на интернет, и тврдат дека тоа им е важно за среќа.

„Социјалните мрежи имаат врска со моето здравје. Дијагностицирана ми е депресија и анксиозност. Она што е најтажно е фактот дека тажните луѓе ги делат само среќните моменти на своите профили, без да ја покажат и другата, грдата страна. Ова имаше големо влијание на мојот живот кога бев тинејцерка затоа што мислев дека сите се среќни и дека нешто не е во ред со мене“, го раскажала своето искуство осумнаесетгодишната Шенон Меклафлин, и додала дека ја депримирало и тоа што постојано се споредувала со манекенките и слабите девојки кои биле воздигнувани затоа што се згодни.

„Некогаш е тешко да сетиме на важноста на вистинскиот контакт со вистинска личност затоа што постојано се обидуваме да ги воодушевиме луѓето преку екраните. Мислам дека е важно младите луѓе да се фокусираат на светот околу нив, а не на нивните телефони“, заклучила Шенон.